Recientemente parlamentario Misha Raymond di Raiz a saca un relato “Gobierno tin cu atende mesora cu salud mental”.
Abigael Arends, di partido AVP ta di acuerdo cu Parlamentario Misha Raymond cu salud mental mester di atencion. Y mescos cu salud mental tin hopi otro aspecto den salubridad en general cu mester di atencion urgente. Obesidad por ehempel. Atencion medico na pashent tanto pa dokter di cas y specialista. Hopi biaha pashent mester warda varios luna pa un cita. Djis pa menciona algun.
Bon mira ta Aruba y nos comunidad en general mester di atencion rapido y serio.
Nos siguridad nacional, nos educacion, nos hendenan grandi, nos muchanan, nos hobennan, nos deporte, nos finanzas, nos flora y fauna, nos departamentonan di gobierno cu mester duna servicio optimal, nos mester pa Aruba ta na nivel di calidad bek y esey ta rekeri esfuerso di nos tur!
Hopi ta esunnan sufriendo ainda cu no tin trabou, cu no sa unda pa drumi, si nan lo come awe, nan no ta vocifera nan dolor pasobra nan tin miedo di represalia cu lo wordo tuma contra nan, ainda tin cu ta sin paspoort pa bay bek nan pais pasobra e structura no ta funciona optimal, y nan ta keda pega akinan na Aruba, mientras tanto na Aruba nos hendenan tin cu carga esakinan mientras nos hendenan mes no tin trabou. Nos hendenan humilde no ta bay critica, no ta bay contra gobierno, no ta bay papia nada, pasobra nan tin speransa cu un dia e solo lo briya pa nan tambe.
Canando den pueblo, den comunidad, bo ta scucha, y lo bo sa kico ta pasando den diferente area y lo bo tende kico e opinionnan ta di funcionamento di e ministerionan di Gobierno y nan respectivo cartera.
Como ciudadano preocupa di loke ta convivencia di henter nos pueblo, bo mester ta hopi bon informa di e terenonan ey y “gara e toro na su cachonan” of pa compronde miho “Busca e raiz di e problema y lo bo keda impresiona cu e resultado”.
Pa hopi aña nos hendenan ta bira victima di diferente problematica cu ta combibi den nos comunidad. Cada ora ta importante pa un ser humano por desaroya su mes, nos sistema ta adecua pero no suficiente y AZV tampoco por of kier inverti den otro alternativanan manera un lifecoach, un terapeuta cu ta persona nan cu ta expertonan independiente riba e tereno aki. Claro tin diferencia entre un psicologo y un terapista, pero e trabou su vision ta mescos, atende e pashent/cliente aki den menos tempo posibel y yud’e, dun’e herment pa e por mehora su bida. Lamentablemente e cupo ta limita pa atende pashent/cliente y tampoco no ta comparti of referi e persona nan aki pa e profesionalnan aki. Cu ta haci e mesun bon trabou pa añanan largo caba riba e tereno aki.
Ta di lamenta cu si no educa pueblo riba tur e sector medico aki y ta keda corta so, of no ta mira espacio pa duna otro flexibilidad na atende cu otro profesionalnan, nos hendenan ta keda bira victima. Victima di abuso di tur forma, victima di abuso mental, victima di abuso sexual, victima di abuso emocional, victima di abuso fisico, victima di abuso verbal. Tur ta crea depresion un mas cu e otro cu na algun momento di nan bida lo refleha bek den nan bida.
Mester enfoca den e leynan tambe cu ta proteha e ser humano aki, pasobra no ta tur biaha husticia ta na banda di e victima aki y e agresor ta core bay of ta declar’e inocente y e ta keda cana rond manera nada no a pasa.
Pa varios decada caba a cuminsa cu turismo di calidad y cu esey ta trece turismo medico. Cu awe ainda nos ta mesun caminda, mester amplia e conocemento di Aruba en general, pa asina crea relacionnan cu esunnan externo, protegiendo nos hendenan di esunnan cu kier bin kibra nos di otro forma.
Prioridad ta Aruba en general, bienestar general pa nos pais, boso traha duro pa esaki!
