Despues di a papia cu Prome Minister Evelyn Wever Croes, kende a baha tuma Manifiesto di maestronan malcontento, e grupo di mas cu 200 persona a cana bay direccion di Parlamento, como e hefe di Ministernan, pa nan tambe ta na altura di e malcontento cu ta existi den e sector di enseñansa y pa nan busca solucion.
Diferente maestro a expresa cu e sentimento ta cu nan a wordo laga na caya, mirando e forma con cos ta wordo haci. Entre otro door di tuma decision, cu ta afecta e maestronan, pero sin consulta e lidernan di e sector.
Presidente di Parlamento Ady Thijsen, a haya pa di dos biaha e diabierna atardi, pa baha y ricibi un Manifiesto di trahadonan preocupa. Prome tabata di empleadonan di MetaCorp y despues e docentenan.
Mirando cu e cantidad di hendenan cu a acudi, ta demostra cu e maestronan ta cansa y fada cu despues di 10 siman no a ricibi contesta riba nan carta. Soraya Waterham, kende ta esun cu a entrega e Manifiesto, a bisa cu nan a duna 100% di nan mes caba y no tin mas forsa. Den e documento ta papia di e preocupacion pa cu maneho di enseñansa; e desconfiansa den e minister; e falta di reaccion di Parlamento cu por duna nan un speransa; etc. Ultimo tempo lo unico cu nan a bin ta experencia ta un maltrato total cu un ambiente di intrankilidad, cu no ta bon pa e tarea cu nan mester ehecuta.\
Thijsen a bisa na final cu nan lo reuni riba e tema y ta bay yama e docentenan, pero no sa den cuanto tempo. Si el a bisa cu dado momento mester tuma un decision y cada ken mester saca nan conclusion.
Tabatin un momento cu e grupo tabata grita pa bay plat, pero un consehero di e grupo, mr. Duineveld, a splica nan cu nan tin tur rason pa ta rabia. Si keda den un accion y escala, e grupo por haya nan mes den un problema huridico. P’esey el a conseha pa warda y si no logra, bini bek cu dobbel of triple e cantidad di hende. “E ora si por bisa cu nos no ta bay ningun caminda. Y laga nan hiba nos corte,” el a bisa nan.
