E “Orde van Vrijmetselaren in Nederland” of Ordo di Masonnan Hulandes ta declara diasabra 14 di september como e “Dia Nacional di Masoneria” na Aruba. Ya desde un cantidad di aña e masonnan Hulandes a desea di trece mas claridad riba nan actividadnan. P’esey cu riba diasabra 14 di september 2019 durante e ‘Dia di Masoneria’ tur Lodgenan Hulandes ta habri nan portanan pa publico en general. Na Aruba tin tres Logia Hulandes: “El Sol Naciente” – “Lodge King Solomon” –“The Middle Chamber” y tambe un Logia Venezolano – “Hiram”. Pa esnan interesa e ta un oportunidad unico pa cera conoci cu Masoneria, e biaha aki tur e lodgenan di Aruba lo ta presente na e edificio di Lodge “King Solomon” situa na Dadelstraat # 27, Dakota.
E Orden Hulandes di Masoneria un biaha mas ta dal portanan habri y tambe aki na Aruba tur Lodge a dicidi di haci esaki. Hopi hende conoce e palabra Mason, pero masha poco hende sa kico ta su contenido. Of nan tin un perspectiva completamente robes di dje. Ta eynan e hermandad kier trece cambio y ta p’esey a institui e Dia di Masoneria.
Tur aña desde aña 2012 riba e di dos diasabra den september tin e asina yama Dia di Masoneria na Aruba. Diasabra venidero 14 di september ta bay tin un “open house”. Na Aruba e ta bay ta na Lodge “King Solomon” na Dakota (si ta bin di Playa direccion rotonde Tarabana ta tuma direccion man drechi pa drenta Dakota via Dadelstraat, Lodge King Solomon ta keda na bo man drechi, edificio blauw).
Masoneria ta pa profundisa den spiritualidad. Asina un hende ta siña conoce su mes mas miho, p’asina e persona por aporta den construccion di un miho comunidad. Mehora mundo pero cuminsa cu Bo mes”, por ta e slogan tambe. Masoneria ta reconoce e balor inmenso di e personalidad humano, e igualdad di tur ser humano, e derecho di cada ser pa independientemente busca e berdad y tur hende su responsabilidad pa su mesun actuacion pa haci of no.
Transicion – desaroyo – ta esencial den Masoneria. E caminda pa mehora bo mes, pa e Mason ta e caminda of e biahe simbolico pa e Luz. Masoneria ta kere cu cada ken na su manera sa cu tin mas cos entre Tera y shelo cu ta move humanidad, un asina yama principio superior. Cada Mason ta liber pa segun su mesun bista pa completa esaki y pon’e manera cu e ta desea. Esun ta kere den un Dios, e otro den e combinacion di forsa di naturalesa y e otro den e supremo den su mes of den su consenshi. Ata otro ta un Budista. Masoneria pues no ta un religion, pero un hermandad basa riba spiritualidad y moralidad.
Bo ta interesa den Masoneria? E portanan di Lodge “King Solomon” ta hancho habri riba diasabra 14 di september durante e “Dia di Masoneria” di 10:00 am pa 14:00 pm. Pa mas informacion wak e website www.dagvandevrijmetselarij.nl y http://www.vrijmetselarij.nl/
