Maarten Thissen a bira ganador di e torneo di golf “Friends”, organisa Djasabra ultimo riba e kanchanan di Blue Bay Resort. Ku un total di 41 punto Stableford Net, Thissen a keda seis (6) golpi bou di su handikep pa gana e vershon di primavera di Friends Golf.
Boris Koster a Sali na di dos luga ku 38 punto. Den e kategoria “gross” esta sin tene kuenta ku e handikep, Jerry Semper a triunfa ku 31 punto, lagando Rick Adriaans na e di dos luga ku 27 punto. E balanan mas leu konekta tabata di Jerry Semper den e klase di handikep mas abou i Wouter van Wieriningen den e di dos kategoria. Wing Chen a dal e bala mas leu den e klase femenino. E bala mas serka tabata di Ronny (Payuyu) Felisia. E hoben Ray Mol (12) a risibi un premio di estimulo, komo uniko hubenil den e kompetensia. E edishon aki di primavera tabata un eksito ku partisipashon di 56 golfista. Despues di e partido nan por a gosa di un sena na Azzuro Restaurant di Blue Bay Beach. Riba e foto e ganadornan durante entrega di premio. Proksimo evento di Friends lo ta verano aki tres luna.
