Un delegashon di e órgano Konseho Sosial Ekonómiko (SER) di Kòrsou, konsistiendo di e direktor/sekretario general señor drs. R. Henriquez i e konsehero hurídiko señora mr. M. Sboui-Racamy, awe mainta a asistí, riba invitashon di e Asosiashon Internashonal di Konsehonan Sosial Ekonómiko i Institutonan Similar (Association international des Conseils économique et sociaux et Institutions similaires, AICESIS), na apertura di e di XVI Asamblea
General di AICESIS na e kapital Santo Domingo di Repúblika Dominikana ya ku e pais aki aktualmente tin e presidensia di AICESIS. SER di Kòrsou, pa basta aña kaba, ta miembro di e organismo internashonal aki, den kua mayoria di pais di tur kuater kontinente tin representashon. E Asamblea General lo dura te ku djabièrnè 8 di sèptèmber próksimo.
Tema prinsipal di e Asamblea General e aña aki ta hiba deliberashonnan i presentá puntonan di bista nobo kon por hiba un lucha efisiente kontra di desigualdat kresiente ekonómiko, sosial i medioambiental i ki ròl konkreto konsehonan sosial ekonómiko mundial por hiba den e kuadro aki. Durante e apertura, e presidente di AICESIS, monseñor Agripino Nuñez, a duna un enkuentro di su presidensia i a pasa e batuta pa Rumania ku lo bai presidí e
organismo pa e próksimo dos aña. E delegashon di Kòrsou a hasi uso di e oportunidat pa, banda di e seshon plenario, deliberá ku koleganan di entre otro Spaña, Ulanda, Suisa, Repúblika Dominikana, Brazil i Guatemala pa fortifiká lasonan riba nivel regional (karibense/latino- amerikano) i interkambiá riba best practices den tur kontinente.
E ambishon di e grupo regional, ku respaldo di Ulanda, Spaña i Suisa, ta pa yega na un plataforma regional di Latino Amérika i Karibe. Den e plataforma aki Kòrsou ta bogando, via un kampaña di lobby fuerte, pa tin un ròl, prominente (p.e. den e direktiva di e plataforma).
