Pa por logra healing (sana) riba tereno di sclavitud, e partidonan mester traha hunto pa yega na e punto ey. Awo cada pais, cada organisacion, ta traha separadamente di otro y esey no ta yuda den e proceso pa sana. Esaki ta loke cu e famoso escritor Luc Alofs a trece dilanti den su discurso tene diasabra ultimo.
Diasabra ultimo tabatin un evento grandi na Hulanda pa Arubianonan. Durante e encuentro anual di Genootschap Nederland-Aruba a pone como tema central conmemoracion di e pasado di sclavitud. Kico e ta nifica pa Aruba y con Aruba mes ta mira riba e pasado di sclavitud.
E mensahe di e escritor ta cu “healing” ta manera algo cu ta contradeci su mes. Healing (sana) ta un proceso cu un persona su mes, cu otro pais of otro grupo. Pero e contradiccion ta sinta den e echo con bo por sana mientras cu bo tin dolor.
“Nos a cuminsa cu e proceso di healing door cu a pidi disculpa pero no ta traha hunto. Hopi grupo ta para pa nan mes, traha nan so, y no pa tur hende. E descendientenan di catibo na Aruba y esunnan den exterior no ta traha hunto. Falta solidaridad entre e descendientenan di sclavitud na Aruba pero tambe cu y entre esunnan na Hulanda y Antias. E ta manera tur grupo ta traha, pensa y actua pa nan mes. Healing ta traha riba un relacion.” Luc Alofs a conta.
E ta admiti tambe e forma con cada isla a experencia sclavitud ta diferente. Pero toch ta interesante pa compara cada situacion. Na Aruba por ehempel, e descendientenan di sclavitud a asimila y integra den comunidad. Pero na Saba e gruponan a keda separa y ta haya un grupo di hende color scur y otro di color cla. P’esey cada isla mester refleha pa mira con pa atende cu su pasado. Pero loke cu tin en comun, ta sclavitud en general. Solamente ta varia con el a wordo asimila y influencia e comunidad.
Sinembargo tur hende mester realisa si unda cu ta sclavitud ta keda sclavitud y cada isla tin e herencia aki.
Alofs casi trinta aña pasa caba a skirbi un buki riba e tema aki. E ta kere e tema di catibo ta algo cu ta bay y bolbe na discusion despues di cierto tempo. E por corda cu aña pasa den cuadro di e tema aki minister Maduro a tuma e iniciativa pa bin cu un programa di conscientisacion. Door di e disculpa pidi door di Hulanda, el a bira tambe como algo cu na Aruba ta reconoce esaki como parti di historia di e isla. “Ta mi speransa cu e tema aki no ta bay mas. Cu lo acept’e como parti di nos historia y no algo pa dos of tres aña so cu ta papia riba dje.”
