Franz Sydow, asistente di director di Botica di Servicio, ta hopi satisfecho pa resulta di e careda y caminata pa conscientisa riba e malesa diabetis. Den e di seis edicion di e evento aki, a participa 1450 persona.
Botica di Servicio ta organisado di Diabetis Run & Walk. Esaki a tuma luga diadomingo mainta y a conta cu 1450 participante, cu ta un cantidad record pa e evento aki. “Ta bunita pa mira asina hopi hende participa pa conscientisa pueblo di Aruba cu diabetes ta un problema hopi grandi.”
Ta contento pasobra den e prome careda tabatin 200 participante y a crece den transcurso di tempo pa yega e aña’ki na 1450 participante, ta algo hopi grandi. Ta sumamente orguyoso di e cantidad grandi di participantenan den e di seis edicion.
E aña’ki Botica di Servicio a traha cu un team di dokter y terapistanan cu ta traha cu mucha p’asina sigura cu nan tin un estilo di bida saludabel pa yuda preveni diabetes y obesitas.
Cu loke cu a recauda e aña’ki, cu ta 15 mil florin, lo bay evalua ki programa por hinca den otro pa implementa den 2024.
E evento tabatin parti den dos categoria di 10 y 5 kilometer, mientras cu muchanan for di 4 pa 16 aña por a participa den diferente categoria.
Segun Sydow, internamente nan tin diferente ac tividad pero pa pueblo nan tin e careda y caminata aki y nan ta spera cu den 2024 e por crece y yega na 1600 participante. Pues keda pendiente pasobra e evento aki semper ta tuma luga den e di dos weekend di november. Riba nan pagina social, por lesa semper ki tempo e registracion ta habri.
