Ta manera un desesperacion tin pasobra tin hende ta canando rond manera loco pa firma e permiso pa Fast Ferry. Tin dos of tres comerciante local cu ta pushando of tin interes den e negoshi di Fast Ferry. Pa colmo tin un hefe di un departamento cu ta cla pa basha firma faltando algun dia prome cu eleccion.
E hefe aki a ser adverti riba e peliger cu tin djis pa core firma pa yuda gobierno core campaña. Na Aruba nos ta mantene nos mes na reglanan segun exigencia Mericano. E exigencianan aki ta hopi halto pasobra tin barconan Mericano cu ta trece miles di turista Aruba. Regularmente Aruba mester pasa inspeccion di autoridad Mericano pa asina cumpli cu e seguridad di waf. Pesey awe tin asina tanto regla rond di tereno di APA.
Awor e grupo aki kier pusha pa e permiso di Fast Ferry den porta di eleccion. A adverti e director di e departamento concerni pa mira bon kico e ta firma y otorga. No tin motibo pa core firma algo a lo loco djis pasobra tin eleccion. Ta miho warda un rato wak e desaroyonan politico y djey laga e cos cana su caminda. Despues di casi cuater aña di gobernacion no a concretiza e proyecto di Fast Ferry y no ta responsabel pa core haci esaki den pura tampoco djis pa broma den campaña.
E ta algo hopi iresponsabel. E forma cu e proyecto di Fast Ferry a ser bendi eyfo tambe ta irealistico. Esnan den e proyecto a pint’e demasiado bunita y departamentonan cu mester haci e control necesario a bisa caba cu e ta imposibel. Yega baha hende y mercancia of carga cu auto etc no ta bay asina facil. E mester pasa tur control. P’esey mes APA of instancianan cu tin tino ta tene cuenta masha cu e ISPS code. Ban wak kico ta e locura cu Fast Ferry cu tur hende a lubida pero kier pusha net den porta di eleccion.
