Den e fin di siman tras di lomba, e federacon di volleyball Arubano, AVA a organisa dos dia di campeonato di beach volleyball na Joe Laveist Ballpark cu a keda converti den un bunita scenario pa e campeonato aki.
Mester bisa cu varios ekipo a femenino y masculino a participa na e campeonato aki. Tabata tin hasta un ekipo di nos hermana isla di Corsow cu tambe a participa na e campeonato aki. Pa loke ta e resultado final nos tin cu bisa cu den e categoria doubles U16 masculino, e duo di Jorvin Cuba y Keanu Vrolijk a keda corona como campeon.
Den e categoria femenino, e ekipo di Corsow, Christine Anthony y Samira Luis – ta bira campeon ganando di Kayla Arends y Mali Rafini di Aruba. Tambe tabata tin e competencia entre e beach volleyballers mas expierencia unda nos ta haya e ekipo forma pa Fransua Angela y Darvick Anthony ta bira e campeon. Aki un total di 7 ekipo a participa di cual dos ekipo di Corsow. Den e final Aruba ta gana Corsow den un wega decisivo. Un pabien na tur e ganadornan.
Pa tanto Aruba como Corsow esaki tabata un bon momento di intercambia deportivo pa asina traha riba e nivel den e deporte aki. Algun aña atras Aruba tabata tin dos tremendo atleta di beach volleyball den Mitchell Dania y Eargenell de Cuba. E duo di Aruba a representa Aruba den e circuito di NORCECA como tambe e compete na nivel internacional den weganan grandi manera Sur Americano(Odesur), Centro Americano y del Caribe como tambe Panamericano. Ambos ta studiando actualmente na Hulanda.
Stichting Sportsubsidie Aruba tambe a yuda subsidia e campeonato di beach volleyball organisa pa AVA.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Stichting Sportsubsidie Aruba.
