E hecho cu Minister-president demisionario a anuncia ayera di no tabata sa mes cu nan lo a kita e dos directornan di WEB Aruba N.V. y tampoco cu a apunta su mesun sua (ruman di su casa) den e posicion di director temporal, a causa reaccion den politica. Lider di fraccion di MAS a cuestion’e publicamente, insinuando cu e prome mandatario di nos pais no ta sincero y no ta papia berdad den e caso aki.
“Gobierno ta doño di Utilities Aruba N.V. y e cartera di Utilities ta resorta bou di Minister-president. Su expresion cu e no sa di nada ta un insulto pa inteligencia di nos pueblo”, asina Marisol Lopez-Tromp a skirbi anochi laat riba su pagina di Facebook.
Ultimo dianan tin hopi pregunta den comunidad riba kico te motibo real cu a conduci na retiro di dos director na un compania estatal. Loke ta resalta mas aun ta cu cada bes cu tin problema sea den un di e departamentonan bou di minister-president of manera awo den un compania cu ta cay bou di su cartera, mesora e prome mandatario ta bisa cu e no sa di nada. “Prome cu esaki tabata na moda p’e bisa cu el a depolitisa tur cos bou dje y cu e no ta firma ni dicidi nada dus no por bisa nada. Pero e trend mes di nos Prome Minister ta semper cu ora tin un problema grandi, pa bisa cu e no ta na altura, cu el a wordo sorpresa, cu e no sa di nada“, asina e lider di fraccion di MAS den parlamento a vocifera.
Locual a hala mas atencion di Lopez-Tromp riba e contesta di minister-president Wever-Croes ta cu “E tiki cu el a sali splica, el a dedica na Corporate Governance. Splica kico ta Good Corporate Governance ta uno, aplic’e di berdad ta otro cos”, di acuerdo cu e ex-minister di Gabinete Wever-Croes.
“Fe’i 2017, na inicio di gobernacion di MEP-POR-RED, Good Corporate Governance tabata un dje prome topiconan di reunion publico den Parlamento y e tempo ey minister-president a splica oranan largo riba e mal gastamento di placa di pueblo y e nepotismo cu el a bin topa den (por ehempel) RDA. El a priminti cu e lo maneha diferente cu gobierno anterior y cu e lo ta transparente cu pueblo. Despues di su contesta corto riba si por ehempel e no ta un conflict of interest cu ta un famia cerca di dje a keda nombra tanten na WEB, cu ta resorta bou di su cartera, e pregunta ta si e Landsbesluit di screening di ministernan ta conta pa otro ministernan so y no p’e. Pasobra eyden e articulo y exigencianan pa percura pa kita y evita posibel conflict of interest cu famia den bo cartera, ta bay basta leu”.
“Pueblo a keda cu mas pregunta cu nunca con e lopende zaken di e dos retironan por tuma luga durante un gobierno demisionario, cu a firma un letter of intent lihe y cu un partner silencioso te cu awor. Cuanto cos mas mester pasa prome cu gobierno forma? Of retironan manera esaki tambe ta parti di e landspakket?”, e parlamentario a puntra.
