Formado mr. Evelyn Wever-Croes a combersa cu e representantenan di Agencia di refugiado di Nacionnan Uni (UNHCR) riba e tema di refugiado na Aruba. E informacion duna p’e agencia ta trata cu tin mas o menos diesshete mil persona cu a bin di Venezuela y no ta documenta. E cantidad aki ta hopi y esey ta practicamente 15% di e poblacion cu no tin status legal.
Na momento cu e agencia a bin Aruba, nan a duna un calculacion di 10% pero awo esaki a subi na 15%. Como cu ta papia di personanan cu no ta documenta, gobierno no tin un registro.
Tambe nan a sinta cu e organisacion cu ta representa colonia Venezolano, cual no ta kere cu e cantidad di UNHCR ta corecto. Door cu e reunionnan cu e stakeholders no ta cla ainda, e formado no por forma nan propio opinion. Unabes cu nan tin esey, e por bisa mas concreto unda gobierno ta para cu e cifranan y principalmente kico nan ta bay haci.
Den region tin pais cu a duna amnistia y cada uno na diferente manera. Pa awo aki no ta papia di duna amnistia, mirando cu esaki no ta e decision di mas responsabel. Esaki ta debi cu unabes un ilegal haya status legal, e tin acceso hasta na cuido medico. Segun Wever-Croes, nan ta den discusion cu Hulanda riba esaki.
Inversionista a cuminsa bin bek y segun e formado, a bisa nan cu no por bin cu hende pasobra aki mes tin hende pa traha. E gobierno actual ta para pa no duna amnistia general na tur hende. Ta bay mira cu si tin empleo, e persona por haya empleo. Esey kiermen e ta haya su permiso.
Pa cobertura mas amplio, lesa e edicion di TREMPAN mañan.
