Diahuebs mainta, alrededor di 9:00 am, a sosode un accidente net un poco pabou di rotonde di Sero Teishi. E accidente aki tabata entre un Toyota Levin right hand color blanco number A-44067, un bus y pickup blanco number A-69629.
E Toyota Levin a bay pa pasa entre un pickup y bus di Arubus, pero e chauffeur no a calcula esaki bon. Na momento cu e ta bay drenta e lane bek, pero e parti patras dje auto a dal n’e banda drechi dje bus. Esaki a pone cu e chauffeur a perde control di e auto y a draai te dal contra di e pickup cu tin un aanhangwagen. Chauffeur di e pickup tambe a perde control di su auto.
Ningun persona a resulta herida den e accidente aki. Chauffeur a yama oficina y informa nan dje accidente, di cual a manda un otro bus pa busca e pasaheronan cu por a yega nan destinacion.
Polis a presenta na sitio y a tuma dato di e suceso. E Toyota Levin a sufri basta daño material. E pickup tambe a ricibi daño material, mientras e bus a ricibi rasca.
