Ora cu tempo ta keto for di costa di Aruba por mira cero Santa Ana, e punto di conexion di Aruba cu Venezuela. Hustamente den e bario di Santa Ana, e yobida intenso cu tabatin den fin di siman a causa un inundacion pisa cu a causa hopi daño.
Hopi a spanta ora cu a cuminsa bisa cero “Santa Ana a bin abou” cu a hiba e pensamento bek na loke a pasa na Aruba 30 aña pasa cu Hooiberg aki na Aruba. Riba e sero Santa Ana a forma tres riu door di e intenso yobida, manera cu por mira riba e potret cortesia di NotiFalcon, y esaki a causa un inundacion grandi den e bario cu ta keda na pia di sero Santa Ana.
E poblacion Santa Ana den municipio Carirubana di estado Falcon, a keda severamente golpia e movemento di tera cu a uni tres “quebradas” cu a baha for di e sero, causando perdidanan material incalculabel, camindanan blokia; pero danki Dios no tabatin perdida humano.
Por bisa cu e habitantenan di Santa Ana, a perde tur cos: corchon te nan aparatonan di coriente. Nan no tin paña, gas, awa potabel ni cuminda. Tur cos mester seca pa nan por haya palonan cu por uza pa nan cushina.
E habitantenan a bisa cu hama nan a pasa den algo asina. Tabatin inundacion den pasado pero hamas nan a mira un coriente dia awa lastra di e forma aki drentando casnan. Ni den e sucedido na 1999. E biaha aki, e yobida a dura solamente dos ora.
E situacion a cuminsa diabierna anochi laat y te diadomingo e ayudo a cuminsa yega debi cu nan tabata incomunica.
Na mes momento a drenta informa di Servicio Meteorologico cu ta indica cu e yobidanan lo sigui te den e prome siman di luna di februari, 2021.
Na Santa Ana 987 casa a registra daño di diferente indole, casnan den cual ta biba en total 1070 famia. Cuatro cas a keda den estado inhabitabel.
