En conexion cu e noticia y preguntanan den medionan local encuanto un posibel traslado di señor George. Jamaloodin for di prizon na Boneiro, Ministerio Públiko ta informa lo siguiente.
Punto di salida ta cu personanan cu a comete un echo castigabel na Corsou y cu tambe a haya un condena na Corsou, tin di sinta nan castigo na Corsou. Esaki ta conta tambe pa personanan cu ta sospecha di a comete un echo castigabel na Corsou y cu ta sintando un detencion preventivo, en espera di tratamento di nan caso.
Esaki por ta diferente, si pa motibo di siguridad, ta considera necesario pa aloca e persona encuestion den un otro instituto den Reino. Pa señor Jamaloodin tambe ta conta, cu lo traslad’é pa Corsou y lo aloké den un centro di detencion riba e isla, na momento cu e situacion ta permiti esaki.
Pa loke ta trata e momento riba cua e traslado aki por y lo tuma luga Ministerio Publico – teniendo cuenta netamente cu aspectonan di siguridad – no ta duna informacion.
Castigo
E ex Minister di Corsou a haya un castigo di 28 aña di prizon pa “uitlokken” di asesinato di e politico Helmin Wiels. E asesinato aki a tuma luga na 2013, di un politico cu tabata hopi popular. No a hay’e culpabel di complicidad directo di e asesinato. Pero si el a duna ordo y a paga pa comete e asesinato. OM a pidi 30 aña y Hof a conden’e na 28 aña.
