Grupo San Hudas Tadeo Dakota ta invita tur devoto na San Hudas Tadeo pa asisti sin falta na e Triduo na honor di San Hudas Tadeo – Santo y Abogado di Asuntonan di Desesperacion. E Triduo lo inicia riba diadomingo 25 di october pa 5:15pm y ta sigui riba dialuna 26 di october y diamars 27 di october pa 6:15pm.
Lo celebra fiesta di San Hudas Tadeo, hunto cu San Simon, riba diaranson 28 di october 2020 cu un Santo Sacrificio di Misa Solemne pa 7:00pm. Ta enfatisa si cu lo tin un Santo Rosario na Reina di Santisimo Rosario, Mama Maria, como ta luna di October, pa 6:15pm, prome cu e Santo Sacrificio di Misa.
Ta recorda pueblo di Aruba cu Santonan ta wordo venera y no adora. Ya ta 58 aña caba cu e Nobena y fiesta na honor di San Hudas Tadeo ta wordo celebra na Parokia di Birgen di Fatima, na Dakota. E prome 35 añanan bao direccion di defunto keri Tula Pablo y for di aña 1997 e nobena a sigui bao direccion di e debotonan di San Hudas Tadeo.
Hesus ta e unico Dios-hende y Mediador di e Aliansa Nobo. Ta un Dios so tin y un mediador entre Dios y nos, esta e hende, Hesucristo (1 Timoteo 2,5) pero mas leu nos ta lesa “Prome cu tur cos mi ta haci un apelacion serio na e creyentenan pa ofrece suplicanan, oracionnan, intersecionnan y gradicimento na Dios pa tur hende. Mester resa pa esunnan cu tin autoridad supremo y pa esunnan prominente, ya nos por biba un bida keto y trankil, yen di respet pa Dios y respet pa hende.
Oracion asina ta bon y aceptabel den bista di Dios, cu kier pa tur hende haya salbacion y yega na conocemento di e berdad: Particularmente mester pidi e intercesion di e Cristiannan den shelo, cu a haya nan santificacion caba, pasobra: “Reconoce boso picanan y resa un pa otro pa boso wordo cura. Oracion di hende husto por haci hopi.” (Santiago 5, 6)
