Sneek ta denuncia: Minister a bypass Hunta di Supervision den schorsing director di AZV

Dialuna mainta lider di fraccion di AVP Marlon Sneek a reacciona riba e decision tuma door di Minister di Salud Publico Dangui Oduber den fin di siman, pa schors director di AZV Ruben Goedgedrag.

Esaki a sosode pa motibo cu el a cera un contracto cu e compania Lite LIfe Med cu ta transporta pashentnan. E compania aki tabatin un relacion di trabou di basta aña cu AZV. Na momento cu Hulanda a exigi pa corta 5 miyon mensual den gastonan, a finalisa e contracto aki.

Marlon Sneek: AVP ta cuestionando gobierno riba suspension di e director na AZV

Posted by 24ora on Monday, October 19, 2020

Sneek den e declaracion ta bisa cu Minister Oduber a tuma e decision aki, sin consulta cu e Hunta di Supervision. “Nos ta hopi preocupa despues di mira e articulo cu a aparece riba 24ora.com,” Marlon Sneek a splica. “Minister a hasta laga su Supervision un banda y e mes a bay suspende e director di AZV pasobra el a logra algo pa e pashentnan.”

Aki Sneek ta papia di pashentnan manera esnan di dialisis cu tin problema pa yega na tempo pa nan tratamento y ora di bay cas.

E Parlamentario a bisa cu e impresion ta cu kier a bula cabes di Lite Life, pa motibo cu campañadornan di e Minister mes a lanta un compania pa brinda e servicio aki. AVP ta lamenta e situacion aki pasobra den e caso aki e director a para banda di e pashent y awo e mester sufri e consecuencianan.

El a duna ehempel unda e mandatario a actua of no, parando na e banda cu ta combini’e of su hendenan. “Un maneho di fixmento pa “friends and family” pa keda cu negoshi despues di gobernacion y e no ta bay pa e ser humano sino pa cumpli cu esnan cerca di dje.”

Asina a haya informacion cu Diego de Cuba ta bay representa Gobierno den conflictonan laboral. “Ta preparando e stoel di mediador pa de Cuba haya esaki ora cu Anselmo Pontilius bay cu pensioen.”