E no ta secreto cu e partido mas grandi di oposicion, AVP, a conoce un caida drastico den voto. Na aña 2017 a cay cu 10 mil voto mientras a bolbe cay na 2021 cu mas voto ainda. Recientemente tabatin polemica riba e caida di AVP. Por a nota cu por lo menos den e top, ta keda cu e mesun candidatonan. For di Mike Eman, Mike de Meza, Arthur Dowers, Benny Sevinger y Mervin Wyatt-Ras.
Den un combersacion cu Mike de Meza el a conta cu e no ta comparti e opinion cu mester bin cambio den front. Claro, e proximo eleccion AVP lo haci algun ahustacion pero na final di dia ta e candidatonan cu mas experencia t’esunnan cu ta carga e votonan. Esey ta locual a sosode ultimo eleccion tambe. AVP ta stabiel y ta preparando nan lista pa e proximo eleccion.
De Meza ta premira cu por yama eleccion e aña aki ainda. E coalicion ta tur na lijm mientras pueblo ta sufri. Poder di compra ta den su pio momentonan. De Meza a enfatisa cu pueblo mester di AVP bek den gobernacion. Nan a demostra den pasado cu nan por haci e trabou y lo haci esey den e proximo gobernacion un biaha mas.
E lista pa e proximo eleccion lo ta uno combina cu e politiconan cu experencia pero tambe e nobonan. Sigur den e top 10 lo mira cambio den candidato. No obstante e trayecto largo di De Meza den politica, esta tanto como parlamentario y minister y mirando cu ya e tin 61 aña, el a termina bisando cu e ta cla y tin gana pa bay un otro eleccion un biaha mas.
