E team di Friesche Vlag a bini hunto na Club San Martin pa asina haci un bunita homenahe na dos persona cu nan stima. Ta trata di Mencho v/d Biezen y Casildo v/d Biesen.
Lissette van Trigt-v/d Biezen, yiu, a splica door cu su tata Mencho y omo Casildo ta na bida y t’ey completo, a dicidi di pone tur hungado cu a yega di hunga bou di Friesche Vlag aki na Aruba pa haci un encuentro. Asina ey a cuminsa planea tur cos memey di februari y e dia a yega pa haci e homenahe.
A gradici Mencho y Casildo v/d Biezen pa tur loke nan a haci den e mundo di baseball. Eigenlijk 33 ex-hungado di Friesche Vlag mester tabata presente, pero shete so no por a yega.
Pa e dedicacion aki nan a bin cu un plakkaat. Riba e plakkaat ta skirbi; “Nos kier a gradici Mencho y Casildo v/d Biezen pa e dedicacion cu bo persona a desplega pa e deporte di baseball. Bo logronan ta un inspiracion pa e peloteronan di awe y mañan. Bendicion di Dios, Friesche Vlag Old Timers.”
Disciplina, pasenshi y respet ta loke nan a siña cada un hungado, ex-hugado di Friesche Vlag. Tambe nan ta gradici na tur sponsor, mirando cu ta e hungadonan mes di Friesche Vlag ta esunnan cu a organisa e evento aki. Esaki ta prome bes den historia cu un team di antes cu a hunga den Little League Ballpark, Mansur Ballpark ta haci un reunion asina grandi.
