Otro luna ta tuma luga e Billfish Tournament. Pa varios aña Varadero ta organisa e competencia aki. E competencia aki no ta solamente p’e adultonan, pero tin competencia di pesca p’e muchanan tambe.
Laura Peñate, Varadero Billfish Tournament, a indica cu mas di dies aña nan ta organisa e competencia aki. Otro luna un biaha mas nan ta organisa e competencia aki cu ta tuma luga dia 20 pa 22 di october.
Pa participa n’e competencia aki, por registra via Varadero su website cu ta https://www.varaderoaruba.com/tournaments y https://www.varaderoaruba.com/salty-kids-pier-fishing, unda tin e linknan di torneo pa inscribi. Pa loke ta trata e premio, segun Peñate, ta bay tin mas di dies mil dollar. Incluso ta bay tin un Kids Pier Fishing Tournament.
Dia 20 ta tuma luga e reunion cu e capitannan, dia 21 ta prome dia di Billfish mientras den ora di atardi tin e Kids Pier Fishing Tournament. Diadomingo, 22 di october, ta e di dos dia di competencia y di biaha ta saca e ganadonan.
Aña pasa nan a haya un boto di Merca, seis di Corsou, p’esey nan ta spera cu e aña aki esey pasa. Peñate ta invita esunnan di Corsou cu kier participa pa haci esey. Aña pasa algun boto di Aruba tambe a bay participa den e torneo di Corsou. Aruba a gana esaki.
Aña pasa conta cu participacion di diesseis boto. Durante e weekend a gara mas di 60 Billfish, mientras cu participacion di mucha tabata riba 70. Cada bes e torneo ey ta crece mas y esey ta algo cu Varadero gusta haci pa trece e entusiasmo den e generacion nobo di piscado.
Comision di Torneo Release Masters ta un grupo pasiona y ta dedica na preservacion y promocion di e deporte billfish na Aruba. E torneo aki di pesca ta mas cu un simpel competencia; e ta un celebracion di nos amor pa e deporte y nos compromiso di preserva y promove e tradicionnan di pesca den nos comunidad. Cu e paso di aña, nos torneo a bira un evento di pesca significante riba e calendario di Aruba como e islanan bisiña.
Varadero kier sigura e continuidad di e deporte stima aki, cu ta sirbi como un contribuyente valioso den e industria turistico di Aruba, fomenta un profundo aprecio pa nos ambiente marino. Tambe ta sirbi como un oportunidad pa involucra y inspira e generacion di mas hoben.
Como parti di nos compromiso cu e preservacion di e deporte, nos ta organisa e Salty Kids Fishing Tournament, unda e hobennan entusiasma tin e oportunidad di siña riba practica di pesca sostenibel y desaroya un amor permanente pa conservacion di marina.
Nos ta manda palabra di gradicimento na tur patrocinado cu ta apoya e evento aki y iniciativa. E patrocinadonan ta Romar Trading, Windcreek, Aruba Airport Authority, Fish House, ATLAS insurance, Atco, UTLT, Aruba Tourism Authority, Napa, Elite y Deepwater.
