Tres ladron cu pat’i cabra den man cada uno a forsa porta di Subway na Dakota y drenta bay cu e caha fuerte chikito. Esaki tabata algo prome cu 2:00 am di diamars. E alarma a activa y e hendenan eybanda a mira con un ladron tabata tene porta y otro dos ta sali cu e caha di placa. Rond eybanda tin basta camara di siguridad y mescos den Subway mes.
E compania di siguridad tambe a yega mesora y tres unidad di polis a presenta. A cuminsa un buskeda den e area patras di Subway pariba di Do It Center. Eynan e ladronnan a core bay y probablemente a subi un auto cu tabata warda nan. No ta conoci cuanto placa nan a hiba. E personanan responsabel pa e restaurant a presenta. Nan a topa cu siguridad cu mas trempan ora a cera tambe tabata compaña nan.
Ya for di atardi a presenta dos biaha un muhe y un homber cu tabata saca potret den e localidad. Ta un dama y un homber cu tambe a keda graba cu e camara di siguridad di e restaurant. El a bin dos biaha y e empleadonan a cay riba su movecion sospechoso. Ademas e dos clientenan sospechoso a djis cumpra dos buscuhi y keda wak den cierto direccion den e restaurant pa mira unda nan mester bolbe pa e safe.
E empleadonan for di atardi y anochi a pidi e compania di siguridad pa compaña nan. Anochi ora a cera a mira e auto cu a bay cu e dos sospechosonan mas trempan scondi banda di Flora Market. Kiermen tur e material di camara di siguridad den e area ta importante pa asina yega na e ladronnan. Cu e declaracion di e testigonan y tambe e empleadonan y material di siguridad, e chens ta grandi cu e ladronnan aki por pasa un Pasco of aña nobo tras di tralie. Polis a tuma informacion di cada persona cu mira algo marduga y tambe cu a mira henter e movecion sospechoso atardi pa anochi.
