Pa mas o menos 11:30 am a bati alarma pa un caso di ladronicia violento na Colombian Emeralds situa den Aruba Marriott Resort & Stellaris Casino. Un homber, di cual ta sospecha di ta Rubiano, bisti cu bril scur, cu short preto y jacket color cora ariba, a drenta e luga y di forma violento a horta varios joyas bay cu ne. E sospechoso a papia bon Papiamento cu e trahadonan eyden. Te na e momento aki no por bisa sigur si tabata arma of no, pero ta revisando camaranan di e hotel.
E sospechoso a sali despues cu e botin, subi un auto marca Toyota di dos diferente color, di cual no ta sigur di e modelo, ta sospecha Vitz of Tercel y cu un bahul color bruin (otro color cu e auto) y a bandona e sitio. Riba camara di siguridad por mira cu e auto ta yega e rotonde di Marriott ta lora riba e caminda di Bakval y ta bay perde den area eytras den e districto di Noord.
Ainda no por bisa sigur kico e botin ta encera pero ta sigura cu el a horta bastante cadena di oro y otro prendanan cu tin den e joyeria. E trahadonan no ta corda di e yega di mira e homber aki, di color Indjan, den e joyeria. No ta prome biaha cu a yega di horta den Colombian Emeralds na Aruba Marriott Resort.
Polisnan ta buscando den varios area simultaneamente, pa por yega na e auto sospechoso. Specialmente den area di Noord. Ta pidi si cualkier hende por mira un auto sospechoso of un homber cu ta cuadra cu e discripcion duna ariba, pa avisa Central di Polis mesora na number di telefon 100. Tur ayudo por hiba autoridad na e sospechoso di practica economia facil.
Un tipo di hortamento asina, posiblemente atraco arma, den un hotel cu awe ta na 94% di ocupacion, ta pone un presion enorme riba e sentido di siguridad di nos turistanan y di Aruba completo. Ta confia den e dinamismo y profesionalismo di nos cuerpo di polis, hunto cu participacion real di comunidad, pa mas lihe posibel nos logra yega na e ladron aki.
