Abogado Hose Figaroa ta consehero legal di sindicato FTA, como tambe ta vice presidente di e sindicato y e ta conta riba e situacion na La Linda. Tin di compronde cu algun trahado a acerk’e.
E abogado a comenta cu luna pasa a wordo acerca pa algun di e trahadonan di La Linda, na momento cu e rumornan a cuminsa core cu lo bay cera e tienda entrante fin di aña, esta 31 di December. Algun siman pasa a bolbe sinta cu un grupo basta grandi, caminda cu e rumor a keda confirma, unda cu di parti di La Linda a tuma e decision pa stop cu operacionnan entrante 31 di December. En todo caso a stop e labor di e grupo grandi di trahado.
A compronde si cu ainda lo tin cierto operacionnan tumando luga. Pero importante ta si pa menciona cu e trabao a wordo para. No ta asina cu e personanan aki no ta den servicio di La Linda. Na e momentonan aki loke ta pasando, tin negociacionnan andando pa wak con leu La Linda lo cumpli cu su obligacionnan legal di paga e trahadonan aki nan añanan di servicio y si ta esey ta e caso, lo yega na una reglo tocante di e pagonan ey. Si esey no ta e caso, lo tin cu wak ki otro pasonan legal lo mester wordo tuma contra di e compania.
Abogado Figaroa a splica cu loke sigur nan tin derecho riba dje, ta nan cesantia. Banda di esey, ta un hecho cu na e momentonan aki La Linda no tin un permiso pa termina ningun hende, esta kita ningun hende for di trabao. Legalmente den e tipo di casonan asina, bo no por djis cera y bisa un trahado cu ta kit’e for di trabao of termina e relacion di trabao. Legalmente tin cierto camindanan cu tin cu cana, sea bo ta bay departamento di labor, pidi un permiso pa retira e trahadonan aki, of bay corte y pidi pa disolve e relacion di trabao.
Na momento cu e departamento di labor, ta te ora cu bo tin e permiso ey den bo man, e ora ey bo por bay over na bisa cu ta bay duna un preaviso e acuerdo di trabao y na e momentonan ey, bo tin cu paga cesantia tambe. E proceso ey ta tuma su tempo. E proceso ey no a wordo encamina ainda door di La Linda. E situacion manera e ta awor aki ta cu tin tur e trahadonan den servicio. Tur e trahadonan cu derecho di ricibi pago ainda y pendiente pa wak si ta yega na un areglo cu La Linda pa pago di nan añanan di servicio of si lo mester bay haci cualkier otro paso legal.
Gerencia
Segun abogado Figaroa, e trahadonan tin derecho di cobra. Tur ta empleado ainda di La Linda. Tur ta dispuesto pa paga. Ta La Linda ta bisa awor aki cu nan no tin cu presenta na trabao. Nan derecho di salario ta keda core. Excepcion lo ta si acaso cu ainda prome cu fin di luna yega na un areglo, den cual ta paga e hendenan aki nan añanan di servicio.
Na e momentonan aki tin negociacionnan andando. A wordo papia tanto cu gerencia como e abogado di La Linda. Ultimo a wordo haci un proposicion di nan banda. E fin di siman aki a sinta cu e grupo di trahado, mas of menos 40 trahado y a discuti cu nan kico lo ta e contrapropuesta cu lo bin cun’e y cu esey lo a yega cerca La Linda.
Den e caso di La Linda tin trahado cu tin masha hopi aña di servicio. Ta papiando hendenan cu tin riba 40 aña di servicio. Loke si ta un hecho tambe ta cu e salario si, no ta salarionan hopi halto. Aunke e añanan di servicio ta hopi, door di e salarionan relativamente abao. Ta papiando aki di un compensacion toch cu no ta exhorbitantemente halto. Sinembargo, door di e añanan di servicio, tin trahado cu tin derecho riba un pakete basta bon, pa asina por termina e relacion di trabao.
E sumanan exacto, e contrapropuesta lo a yega cerca La Linda, e ora lo keda den espera di kico nan respuesta riba esaki lo ta.
Di parti di Gerencia, loke a wordo bisa na mesa, cu nan ta dispuesto pa paga algo. Nan a haci un proposicion tambe den cual ta propone pa paga algo. No mas cu den opinion, toch esey no ta suficiente pa e añanan di servicio cu e trahadonan aki tin. Ta pesey lo bay haci un contrapropuesta cu lo haya mas na su luga. No ta bay pa solamente añanan di servicio, pero toch di trahadonan cu nan edad ta relativamente halto. Tin un grupo basta grandi cu ta 40+. Tin hasta 50 y 60+. Ta un hecho cu na momento cu e edad ta bira mas halto, chens riba mercado laboral ta bira mas chikito. Den un caso asina aki, e compensacion mester ta refleha esey tambe. No por ta asina cu bo ta duna un hende un paar di luna di salario, como compensacion mientras cu un hende asina aki lo bay pasa lunanan largo of hasta aña prome cu e haya un otro trabao, mirando entre otro su edad.
