Na Tony Romas tambe tin hende a perde nan trabao. A aloca algun di nan den otro areanan. Abogado Hose Figaroa a comenta cu den e caso aki, na cuminsamento tabata tin basta friccion.
E no a bay mucho bon. Tabata tin algo tiki similar na loke ta pasando awor aki na La Linda, unda cu gerencia a dicidi pa cera. E diferencia ta, cu nan si a cera completamente di un dia pa otro y a bisa e trahadonan cu no tin trabao mas y no tin pago mas.
Pero den e caso eynan, a sigui negociacionnan. Na cuminsamento a bay un tiki stroef, pero na final a bin sali afo y a logra cu e trahadonan en todo caso, a ricibi un pago pa nan añanan di servicio. No ta idealmente loke tabata kier como representante di e trahadonan, pero bao di e circunstancianan, si tabata lo mas responsabel na e momento ey.
Tabata tin un situacion di un compania cu no tabata tin nada mas. No tabata tin bienes, ni ningun caminda mas cu por a saca algo for di dje. Bo mester a probecha berdad y esey a wordo splica na e trahadonan. Por a cuminsa procesonan legal y gana casonan. Gana caso ta un cos, pero recobra e placa ta algo otro. A sigui negosha cu nan, a sigui pusha y a logra si cu e empresa a paga e añanan di servicio di e trahadonan aki. E ta finalisa, pa loke ta trata e capitulo di Tony Roma’s.
E trahadonan a haya nan pagonan respectivo y di e forma ey e relacion di trabao a wordo termina, segun e abogado.
Legalmente tin ley. Toch con cu bay bin, cada biaha trahadonan ta sali perdi den cierto forma. A yega di cambia ley caminda cu si un luga a yega, no por habri bek, pasobra si e habri, e trahadonan mester keda si mester regla cu nan. Segun e abogado den tipo di casonan aki tin ley berdad. Por ehempel den caso cu un compania ta cera, bo tin por ehempel ley di cesantia, unda cu en todo caso, si acaso e compania no tin nada mas, e fondo di cesantia tey pa cubri, pa paga parti di e compensacion pa e añanan di servicio. Na momento cu termina un relacion di trabao, no ta cesantia so tin derecho riba dje. Mester duna preaviso. Por ehempel na Westin Hotel, tempo cu nan a cera of Valero, tempo cu el a cera su portanan, a negosha paketenan cu ta hopi mas cu solamente bisa e minimo cu ley ta garantisa. Pero en todo caso, tin cierto leynan, por ehempel e ley di cesantia cu ta bisa cu den caso cu e dunado di trabao no por paga mas, of si e dunado di trabao bati bancarota, na e momento ey SVb, for di e fondo di cesantia ta garantisa e pago di e cesantia.
Pero, ley, na momento cu un compania cera y otro ta tuma over, berdad den e casonan ey e trahado ta bay over automaticamente, pero, ta haya den problema na momento cu companianan cu ta cera y no tin un overname. Por ehempel den e caso di La Linda awor aki, cu en principio e intencion ta pa cera completamente. No ta asina cu un otro empresa ta bin tuma over e operacionnan. E ora eynan, loke tin ta cu ley ta bisa, den casonan asina, un dunado di trabao mester bay pidi un permiso pa retira e trahadonan aki, loke no a pasa. Si acaso e permiso ey wordo duna, lo mester duna e preaviso, esta opzegtermijn, cu ta varia entre un y cuater luna, depende e cantidad di tempo cu e trahado a labora.
Banda di esey tin derecho riba e cesantia cu tin cu wordo paga, cu tambe ta depende di e cantidad di añanan di servicio.
E leynan tey, pero tin circunstancianan unda cu ley no ta duna e gratificacion cu lo spera como trahado. Tin opcion, manera di aumenta locual ta cesantia. Esey kisas lo ta algo cu lo por pensa riba dje.
Na Hulanda por ehempel, tin loke ta wordo yama transitievergoeding, cu ta algo cu tin cierto parecido na cesantia, pero cu e sumanan ta un tiki mas halto. Esey atrobe riba su mes, no ta un garantia na momento cu un empresa cera.
Loke si tin un garantia ta por ehempel si e ora ey bo tin e fondo, den e caso aki e fondo di cesantia, esey si ta garantisa. Den un worse case scenario, ta haya e pago ey. Esey no ta e unico cos cu bo tin derecho riba dje, na momento cu e relacion di trabao yega na su final.
