Directiva di Camara di Comercio y Industria di Aruba (KvK) a extende un invitacion na Directiva di ATIA pa un reunion caminda a elabora riba e idea tras di un plataforma di colaboracion entre e organonan importante pa comercio aki na Aruba.
E reunion aki a tuma luga diaranson 24 di januari ultimo den e sala di auditorio di KvK. Ambos directiva tabata bon representa y a hiba un reunion hopi fructifero.
Despues di a introduci tur e miembronan di ATIA y di KvK, a sigui cu e punto principal di agenda cu ta e plataforma di colaboracion. E intencion tras esaki ta pa uni forsa pa asina por atende cu diferente asunto cu ta tumando luga den e mundo di comercio. Tur esnan presente a mira cu esaki ta brinda oportunidad pa crea lasonan positivo y tambe un bon base pa discuti diferente puntonan cu ta impacta economia di Aruba y presenta esaki na Gobierno di Aruba.
Durante e reunion a elabora riba asuntonan al caso manera e situacion di Citgo Aruba, Repsol, Venezuela, diversificacion di nos pilarnan economico y algun preocupacion di e comerciantenan. Ademas a toca e punto di e posibilidadnan empresarial cu e “Doral Sistercity Program” ta brinda pa e comerciante local su desaroyo.
ATIA y KvK a indica cu lo intercambia nan documento cu conseho pa Gobierno cu e intencion di fortifica e puntonan unda cu ambos ta coincidi cune. Di e forma aki forma un base mas solido pa por logra e metanan cu tanto ATIA como KvK kier logra pa Aruba y su sector comercial.
