E economia di Aruba ta tiki stagna. Banco Central di Aruba a laga sa cu e economia lo crece 0.8% den 2020, segun Kawish Misier ta splica, ta minimal.
Si wak otro paisnan manera China, nan ta crece 7 pa 8 porciento den un aña. E economia cu ta crece na Aruba den 10 aña, otro pais ta yega den 1 aña. Eynan tin cu wak cu esaki ta un situacion fragil y e economia di Aruba ta depende riba turismo.
Awo por scucha cu Gobierno kier aumenta e salario minimo cu 3%, cu den opinion di Camara di Comercio, no ta e solucion adecua pa yuda esnan cu ta gana salario minimo.
Comerciantenan kier pa e grupo aki tin mas poder di compra. Mas poder di compra nan tin, mas producto nan por cumpra y mas miho pa e comerciante. Pero no mester ta asina cu nan ta contra e grupo aki. Ta mas bien cu e comerciantenan ta boga pa gobierno baha nan gasto, pa asina nan por baha nan impuesto, pa asina esunnan cu ta ricibi e minimum loon, tin cu paga menos inkomsten en loonbelasting, p’asina nan ta haya mas placa y entrada cu nan por gasta atrobe den economia di Aruba.
Pero door di laga belasting mesun cos y ta aumenta e salario minimo, e ora ey e comerciante cu tin cu paga e salario minimo, tin hopi mas gasto. Ora un comerciante tin mas gasto, e ta bay inclui esaki den su prijs. Esta e prijsnan den tienda y tur caminda ta bay subi. Hunto cu e diviezenprovisie, awo cu e minimum loon y otro medida cu ta bay bin, e prijsnan den tienda ta bay subi. E consecuencia di esaki ta inflacion, Misier a bisa.
Pa soluciona e inflacion, kier bolbe subi minimumloon. Esaki ta un ciclo vicioso y negativo. E no ta soluciona net nada y ta medidanan populista. Henter e aña Camara di Comercio a comunica y a presenta cu nan ta mas cu dispuesto pa soluciona e problema, pero e problema no por solucion’e door di hisa e salario minimo. Ta soluciona door di bin cu un reforma fiscal di berdad y duna e pueblo mas poder di compra.
Mas reaccion
A haya un reaccion hopi cortico di Aruba Hotel And Tourism Association (AHATA), kendenan tambe ta forma parti di SER. Nan ta contento cu Minister di Labor a busca recomendacion di SER prome cu a finalisa e decision. “Esaki ta un bon ehempel di un Minister cu ta busca dialogo. Den SER tin participacion di sector priva y SER a bay di acuerdo unanimamente cu e aumento di 3%.”
Nan a agrega si cu nan ta spera cu Gobierno cuminsa corta den su gastonan y demostra unda ta bay corta esakinan, enbes di sigui causa inflacion cu introduccion di mas impuesto.
ATIA di nan banda a comenta cu nan tabata na altura di e decision aki pasobra nan tin representacion den SER. “Nos tabata di acuerdo conforme e inflacion cu tabatin. Ademas minister a informa nos oficialmente prome cu el a anuncia su decision. Akinan si tabatin bon comunicacion.”
