Despues di denuncia di un grupo di 18 famia cu tabata huur un espacio riba huurgrond na Calabas, e supuesto propietario Winfred Petronilla a reacciona bisando cu nada di loke e hendenan ta bisa ta berdad.
E famianan cu tin nan trailer poni riba e huurgrond, pagando 300 florin pa un espacio chikito y pagando awa y coriente dobel di e prijs real, a keda perhudica ora e propietario a keda sin paga e coriente di e hendenan aki. A resulta cu e tereno no ta pertenece na dje mas, segun Departamento di Infrastructura y Planificacion.
Evelin Cruz y Kimberly Medina a expresa nan preocupacion pa motibo cu nan ta perhudica. Nan no tin coriente, ta biba den container y awo a keda den calor inmenso, sin internet pa por haci nan huiswerk. Tur e esnan cu tin trailer of container riba e tereno ta bisa di ta paga rigurosamente nan huur y gastonan di utilidad.
Petronilla inicialmente no kier a duna un declaracion y despues a dicidi di duna su comentario. El a bisa cu e hendenan ey a bay tur caminda lubidando cu ta e ta doño di e tereno y e ta bisa cu e hendenan aki no a pague nada. E ta bisa cu e tereno berdad ta huurgrond y ta riba su nomber ainda. E no a huur tereno cu e hendenan aki sino solamente a trata di yuda nan.
El a splica cu e no mag di huur e luga pasobra ta un huurgrond y solamente el a trata di yuda nan. E mes a bay ELMAR y WEB pa bisa nan corta e coriente pa trata di core cu nan tur for di e sitio. “Mi a cla cu e hendenan aki, mi no kier deal cu nan. Solamente mi kier nan busca caminda pa nan bay.”
E ta admiti cu el a cobra e hendenan aki 1 florin pa kilowatt. Esaki, el a declara, nan tabata pasa pasobra el a informa nan cu esey e ta bay cobra pa pone coriente pa nan.
Na final el a bisa cu e no kier problema cu gobierno y p’esey el a laga kita e coriente pa nan bay for di e sitio.
