E aña aki no tabata uno facil. Nos ta den un crisis. Tabata tin un crisisheffing. E cost of doing business a subi drasticamente. Esey ta feedback cu KvK ta haya di su clientenan. Durante conferencia na Camara di Comercio a confirma esaki via e vice presidente Kawish Missier.
A papia cu diferente stakeholder y ta hopi importante cu e comerciantenan ta conciente di kico ta pasando, no solamente na Aruba, pero tambe den Caribe.
Aña pasa tabata tin e horcan cu a pasa riba e islanan di Caribe, cual tabata positivo, pasobra e hotel di e otro paisnan a cera, y mas cliente a bin Aruba.
Pero 2019/2020 lo ta e aña cu e hotelnan cu a wordo distrui, lo finalisa nan renobacion. E hotelnan ey ta casi nobo. No solamente esey. Nan lo subi mercado, pero nan lo bin cu prijsnan hopi abao pa haya mas marketshare. Mester ta hopi conciente cu otro islanan den Caribe lo competi pa e mesun cliente cu Aruba ta competi p’e.
Pesey ta hopi importante pa vigila e situacion di cerca y keda competitivo y keda traha hunto cu un bon vision pa e negoshinan na Aruba keda mas fuerte, mas innovativo y mas duradero.
Kawish Misier a splica cu e ta hopi orguyoso cu gobierno mes a puntra KvK pa duna conseho riba e reforma fiscal. Y e reforma fiscal lo ta hopi importante. Tur hende cu ta biba na Aruba, lo wordo afecta den e reforma fiscal y kier pa e procesonan di belasting bira mas lihe, mas efectivo y mas transparente pa asina tin un comunidad cu ta paga un belasting mas husto.
Ta bezig ta traha riba e version di KvK di e reforma fiscal. Nan ta casi cla y lo pidi feedback di e comerciantenan como tambe e specialistanan y otro stakeholders, pa asina bin cu un bon documento di e version di KvK di e reforma fiscal. Esey lo entrega na gobierno.
Misier ta spera cu e lo wordo ricibi cu man habri, pa asina dialoga y combersa cu gobierno y minister encarga, pa asina yega na un miho documento, miho plan pa full nos comunidad.
