Awe mainta a sosode un incidente cu practicamente a pone hende na grito na Corsou, ora cu un kraan a dal contra pia di Julianabrug den Willemstad. E barco Wish Way a yega waf di Corsou cu dos kraan. Henter mainta media di Corsou a cubri entrada di e kraannan aki. Un cantidad di hende a presencia e entrada y colision di e kraan aki na e brug.
Na prome instante a maniobra e barco pa drenta e waf y segun informacion di medionan cu mester a pone balast den e barco pa asina por balansa e barco pa asina drenta cu e kraannan bao di e brug. E kraannan aki ta destina pa reemplasa e kraannan cu tin por lo menos 40 aña den funcion na e waf di container na Corsou.
Ta un barco grandi, un coloso cu a drenta e waf gigantesco. Tugboat a guia e barco, pa asina drenta e waf. E impacto contra Julianabrug a sosode en bibo riba television nacional na Corsou. Mientrastanto e barco cu a trece e kraannan aki a maniobra tal manera despues cu finalmente por a pasa cu e kraannan bao di e brug.
Mientrastanto a cera e brug y a yama un conferencia di prensa pa suministra informacion di e incidente. Minister di Economia di Corsou, Giselle McWilliams a indica cu apesar di e incidente toch nan ta orguyoso caminda cu por a mira un cantidad di hende cu a sostene e team cu a trece e kraannan Corsou.
Ora tin cosnan grandi asina, tin cierto riesgonan y no ta tur dia ta hinca kraannan asina grandi den waf. Mester pone enfoke di e cosnan positivo cu a sosode y e profesionalismo di tur esunnan envolvi pa trecemento di e kraannan den e waf. Esaki ta nifica cu lo bay tin mas eficiencia den e waf y lo complementa e economia.
Pa loke ta e brug, Minister Zita Jesus-Leito a splica cu Julianabrug ta e ader di trafico mas importante cu tin. E ta conecta Oost cu West. Ta hopi dia a prepara pa e yegada aki den cooperacion cu e loodsnan. Hunto cu Obranan Publico, ta sigura asina pa tur cos bay bon y el a bay bon. Unico cos ta e incidente cu a sosode. E parti mas ariba, e parti mas debil di e kraan, a dal riba Julianabrug. Esey a pone cu a haci un investigacion. For di e momento cu e suceso a tuma luga, a bin mesora inspeccion pa asina percura cu parti pafo con e brug a keda. Rond mundo a mira kico a pasa. A inspeccion parti pafo y despues a haci e inspeccionnan di paden tambe.
E Minister a tuma nota di con e brug ta paden y tambe caminda cu e daño a keda haci. Por a duna pueblo di Corsou y henter mundo cu no ta papia di un asunto di siguridad. Por sigui uza e brug trankil. A duna ordo tambe pa uza e brug. Den un suceso asina ta bay haci investigacionnan di cerca den e proximo dianan pa wak pa tur cos ta OK y loke a mira cu berdad tambe ta asina ta y cu no tin ningun motibo di preocupacion. For di expertonan no tin motibo pa preocupa, segun e Minister.
