Dia 1 di februari 2020 a regresa Aruba for di China algun residente Chines. Segun informacion ricibi, e residentenan aki no a hospeda na ningun region afecta pa Corona Virus COVID-19 na China, ni tampoco tabatin contacto cu ningun hende malo, cu ta e criteria defini pa considera un persona sospechoso, asina un relato di prensa emiti pa Gobierno di Aruba por medio di Departamento di Salubridad Publico, a duna di conoce.
Pa ta sigur cu e famia aki no tin e virus y ta encontra nan mes den periodo di incubacion unda sintomanan lo aparece despues, seccion di malesa infeccioso a pidi colaboracion di e famia pa keda den cuarentena pa 14 dia. E famia a compronde esaki y a colabora cu e proceso.
Awe diadomingo, despues di 14 dia, Departamento di Salud Publico ta informa cu e famia encuestion ningun dia a presenta sintomanan sospechoso y desde awe ta liber di cuarentena.
