Fin di siman tras di lomba, tabata e prome fin di siman liber. Liber den sentido despues di un aña caminda Aruba su bida nocturno, tabata casi nihil. Gobierno a flexibilisa e medidanan, caminda cu tur establecimento tabata por a traha segun nan permiso di operacion. Pero esaki sigur tabata tin su consecuencianan. Tabata un fin di siman, caminda cu Aruba a los laga bay.
ACCIDENTE
Den un weekend tabata tin 60 dalmento, bringamento na gran escala na diferente club nocturno, problema cu musica halto, problema di comportacion di e clientenan na e establecimentonan nocturno. Comunidad no a sa di comporta su mes, cu tur su consecuencianan.
CONTROL RIBA ESTABLECIMENTO NOCTURNO
Ta lamentabel, cu cierto momento a pidi pa flexibilisa di tur manera, a tene cuenta cu economia di Aruba, cu diferente factor. No por keda cu medida, aña aden, aña ‘fo! Cuerpo Policial no ta bay keda tene man di e comunidad, bisa doño di establecimento, pa tene cuenta cu e reglanan. Esaki ta e comienso di e periodo di vakantie, e controlnan lo sigui. Cuerpo Policial lo no acepta agresion di su miembronan, na ningun forma. A pesar di tin limite, Cuerpo Policial tin cu traha cu diferente riesgo den nan trabou, pa garantisa siguridad di e comunidad. Pero doñonan di establecimento no ta compronde cu tur hende mester tene nan mes na regla.
No mester bira un discusion ariba regla, ariba orario di ceramento. Comportacion di pueblo y control di Cuerpo Policial ta bay man den man.
ACTIVE SHOOTING
Ademas di tur e asistencianan cu tabata tin den fin di siman, cu accidentenan na gran escala, establecimentonan cu no ta tene nan mes na regla, unda cu na un cierto luga polis mester a bay seis (6) biaha na e mesun luga, tambe tabata tin un asina yama “drive-by shooting”.
Riba tereno di “active shooting”, Cuerpo Policial a tene varios “lezing”. Na comienso niun hende a tum’e na serio, pero despues cu e suceso na Colegio Arubano a lanta cabes. Segun parce, tabata un alumno di Colegio Arubano cu a hinca den su cabes cu e lo bay basha bala na scol. Na mas di un ocasion, Cuerpo Policial a logra evita tiramento na scol.
E situacion na Lekker Bar, ta bou investigacion, pa determina ki tipo di arma. Tin manera un trend cu a cuminsa for di diamars marduga, cu asesinato dilanti American Bar, sigui pa e caso di tiramento riba e señora na Tanki Leendert, dilanti Cas Casuela. Y den fin di siman, ta manera fierno a habri su portanan y tur diablo tabata riba caminda.
CANTIDAD DI ARMA RIBA CAYA
E preocupacion mas grandi na Aruba, ta e cantidad di arma cu tin actualmente riba caya. En berdad, Cuerpo Policial tin 460 polis cu tambe tin acceso na arma. Pero e importante ta, e salud mental di e persona cu tin tras di e arma ey.
E cantidad di arma rond ta forma un peliger pa e pueblo di Aruba. Si loke a tuma luga na Lekker Bar & Restaurant den fin di siman, a tuma luga den e area di hotelnan, esaki lo tabata tin un efecto devastador pa nos economia. Cuerpo Policial kier pone man mas pronto posibel riba e persona responsabel cu a tira riba e autonan.
Den fin di siman tabata tin un grupo grandi di polis riba caya. Esaki ta costa pueblo di Aruba basta placa. Si haci esaki tur fin di siman, saca un grupo grandi di polis riba caya, dado momento Cuerpo Policial lo haya problema cu nan presupuesto.
PROBLEMANAN MENTAL
Tur stakeholder mester determina kico e sospechosonan deteni, kico ta e problematica na Aruba. Hobi di e hobennan, di 19, 20 aña, no tur ta completamente desaroya. Algun di nan ta papia manera mucha di 11, 12 aña. Y ta net e hobennan aki hopi biaha tin arma di candela den nan poder, cual ta algo cu no tin control riba dje. Hunto cu Departamento di Asunto Social, departamento encarga cu problema mental. Hunto mester yega na un punto di con ta bay pak aan e problema aki, prome cu ta laat.
