Diamars 22 DI JUNI 2021 Johnson’s Enterprises a haci un demostracion riba e Parkietenbos landfill pa cu un producto y proceso cu lo por wordo uza pa asina alivia e vecindario Parkietenbos di e holo malo, huma y candela.
Johnson’s Enterprises conhunto cu e compania Mericano LSC Environment cu ta produci e producto Posi-shell a presenta y a aplica un seccion riba e landfill pa asina mustra e efectividad di e producto cu ta tapa e desperdicio cu un laag di material (entre 1-2cm) cu no ta laga holo malo, candela ni huma sali. No solamente holo malo, huma y candela, e Posi-shell lo remedia, pero tambe desperdicio cu actualmente ta bula bay den lama of mangrove lo wordo conteni.
E producto ta wordo considera environmentally friendly y e ta uno hopi efectivo y costo abou cu cualkier otro proceso pa tapa e landfill y metiga e problema nan vigente riba e landfill. Loke Johnson’s Enterprises a tene na cuenta; si kier bay cera e Landfill di Parkietenbos – e problema di holo, huma y candela lo keda vigente y si den futuro kier saca tur cos, e proceso lo ta tuma tempo (añas) y ta un proceso costoso. Pesey Johnson’s Enterprises a presenta un opcion, pa por brinda un solucion alternativa temporal cu ta den bienestar di specialmente e bario di Parkietenbos y Aruba en general, pa por tin tempo pa dicidi y yega na e solucion final.
Un otro factor cu tambe ta di suma importancia, ta nos turismo. Si aplica full e landfill, e landfill lo haya un color uniforma cual lo duna un otro impresion estetico specialmente cu e landfill ta hopi cerca di nos aeropuerto. Johnson’s Enterprises ta consciente cu e proceso aki no ta e solucion final, pero si un solucion alternativa y un alivio pa e habitante y vecindario di Parkietenbos.
Pa wak e proceso di e demostracion di aplicacion por bay riba pagina di Facebook di Johnson’s Enterprises – JEAruba – pa wak e video.
