Diahuebs den oranan di atardi, directiva actual di Koningin Wilhelmina Fonds a rindi homenahe na e prome directiva di Koningin Wilhelmina Fonds (KWF).
Directora actual di dicho organisacion, Lilian Prince a elabora riba e historia aki. E prome directiva di KWF tabata bou presidencia di Irma Beaujon-Brouwer, secretaria Alice de Veer- Henriquez y e prome tesorera tabata Dorotea Dennert- Tauber.
Actualmente e fundacion no por desplega nan actividad pa recauda fondo manera mester ta. Ta buscando cual ta e forma miho pa haci esaki, pasobra no tin entrada. No por bisa cu e fundacion ta failliet, pero cu nan no ta haya e fluho pa por sigui traha cu ne ta sigur. E gastonan anual actualmente, ta riba 135 mil florin pa aña y e ora ey, como directiva mester traha hopi duro pa trece placa aden. E directiva ta traha a base boluntario, nan no ta gana niun cen. Si nan tin verpleegsternan cu mester percura pa nan haya pago, ya cu nan ta gasta gasoline ora cu nan sali di cas. Pues tin cu paga pa e trabou desplega. Ta spera cu lo por tin un solucion, a pesar di e pandemia, pa toch nan por recauda fondo.
Por ultimo, Lily Prince a manda un mensahe, primeramente na e comunidad femenino, pa percura, cu si nan haya yamada pa bay haci un chekeo, haci esaki. Pa e cabayeronan, cu si nan ta sinti algo, bay cerca un urologo, pa check e prostaat. Ta bon pa conoce rond di bo cas, es decir, kico bo bieunan a padece di dje. Ta importante pa un persona sa di esey. “Ta importante pa nos sa nos historial familiar, pa ora yega dokter, nos por bisa kico ta conoci den famia y kisas, cu’n sintoma cu bo tin, ta conduci, cu lo mester haci cierto chekeo, pasobra e ora ey, e ta spaar bo bida. Sea consciente di dje, stima bo mes.”
