Applications For Administrative Solutions (AFAS) Foundation a cuminsa cu un proyecto di scol na Aruba pa por embeyece e scolnan. AFAS ta bay yuda un total di 16 scol den e proyecto aki.
Segun Rothmar Coenrad, manager di AFAS Aruba, e scolnan ta bay cuminsa cu e proyecto y tin te cu dia prome di mei pa cab’e.
Tur otro scol cu tambe ta participa, tin cu encurasha e comunidad, mayornan, maestronan, pa forma nan grupo di boluntario, teniendo na cuenta cu tur e protocolnan na su luga cu tin awo.
Pero pa yuda den e proyecto pa ehecuta esaki, mas miho posibel y cumpli cu deadline di dia prome di mei, unda cu tur cos mester ta cla.
Dicon deadline?
E proyecto aki ta pa traha pa un meta. E scol cu realisa su proyecto miho ta sali ganado y asina ricibi un premio extra como estimulo pa e trabao haci.
AFAS a haya mas di cuarenta peticion di parti di e scolnan, cual ta di aplaudi. Tin cu menciona tambe cu e proyecto aki tin derecho di existencia.
E siguiente fase ta pa selecta e scolnan y cada scol ta entrega un oferta unda cu nan tin diferente material cu nan mester realisa cu e proyecto. Hunto cu Kooyman ta realisa esaki pa provee e materialnan, y cada scol ta haya esaki pa bay tuma y ehecuta e proyecto.
Primordialmente ta bay cubri tur material cu tin mester pa ehecuta e proyecto. E ta varia for di verf scol, drecha baño, te cu traha gazebo pa e muchanan pa nan por tin algo pa sinta bao di dje.
Cada scol ta entrega nan proyecto y e parti ey ta di aplaudi pa mira con e maestronan a ehecuta esaki, traha un plan y awo ta cla pa ehecuta. Coenrad ta hopi entusiasma y ta sigur cu e proyecto aki ta bira algo hopi exitoso.
SKOA satisfecho y contento
Anounshka Baly, directora di SKOA, a menciona cu AFAS a acerca nan for di december cu e informacion cu scolnan por a entrega un peticion pa un proyecto, caminda cu e proyecto ta encera con ta bay haci e scol mas bunita.
Den e caso aki basta scol di SKOA a reacciona y 13 di nan a keda scogi, despues cu a entrega nan proyecto, pa asina nan por haci e proyecto pa embeyece e scolnan.
E proyecto aki ta uno hopi bunita segun Baly, pa motibo cu ta duna e scol e oportunidad, den e caso aki e cabesante, hunto cu su team, pa mira kico por bay haci na e scol.
E scolnan a traha duro pa entrega e proyecto. SKOA ta sumamente orguyoso y contento cu e logro aki. E parti facil a pasa, cual ta entrega e proyecto. Awo e parti mas dificil ta bay cuminsa, cu ta ehecuta e proyecto.
Aki ta pidi comunidad di Aruba, como tambe e comunidad di e bario unda e scolnan ta ubica, pa acudi na e scol, pa asina duna un man. E ta a base boluntario pa embeyece, sea ta verf, haci carpinteria, etc., diferente trabao riba e scol. E scol ta cas di e alumno pafo di su cas.
“Ban tur hunto ban yuda e cabesante, e docente, e team di e scolnan aki pa embeyece nan scol den bario,” e directora a termina bisando.