Riba 20 februari 1965, Kiwanis Club of Aruba a wordo instala oficialmente como e prome club di Kiwanis na Aruba. For di su inicio, e club a organisa diferente proyecto pa comunidad, cu enfoke riba e muchanan na Aruba.
Durante nan 56 aña di existencia, nan a organisa centenares di proyecto, haci mas varios miyon di donacion na instancia of causanan nacional y internacional, y tambe sosteniendo e programa di liderazgo di servicio pa hobennan na diferente scol, semper cu sosten di comunidad y comercio.
Clinton Whitfield (dfm) a funda e club y a sirbi como e club su prome presidente y a crea un mundo nobo di servicio comunitario riba nos isla. Decadanan despues, naturalmente a bin hopi cambio y desaroyo den e club, pero locual a keda consistente durante 56 aña di servicio ta e amor pa comunidad, muchanan y humanidad. Kiwanis Club of Aruba ta keda cu su vision pa un miho futuro pa Aruba y pa mundo henter, cu nan ta demostra den nan proyecto- y donacionnan henter aña.
Awor den 2021, e club ta bou di liderazgo di presidente Ingmar Ramharakh, hunto cu 10 otro miembro di directiva cu un total di 40 miembro. Trahando hunto, nan ta haci Kiwanis Club of Aruba locual e ta awe, un club enfoca riba e desaroyo di nos isla, dunando oportunidad na personanan den necesidad y luchando pa un miho futuro pa nos muchanan. Un danki grandi ta bay na tur miembro, ex-miembro y tambe na tur persona y instancia cu a duna nan aporte. Pa mas informacion, please bishita nos website: www.kiwanisclubofaruba.org
