Director di KIA, Gino Winlaar, a confirma cu tin dos trahado cu a test positivo pa Covid-19 pero cu e situacion ta totalmente bao control. Siman pasa dos trahado a sinti sintoma na momento cu nan tabata pafo di KIA, pues no na trabao. A tuma tur e pasonan necesario, a keda kas y yama nan Dokter pa haci test.
Internamente hefe di cuido Dr. Aron Verschuur a tuma contacto cu DVG y bao di nan guia a realisa “Contact Tracing” pa investiga y identifica posibel contactonan cu e trahadonan aki por tabatin cu otro trahado of preso den KIA.
Ta bon pa menciona cu Staff di cuido di KIA a haya tur training necesario pa ta bon prepara pa na momento cu un caso positivo presenta. Trahadonan ya ta uza tapaboca y tur esunnan cu ta bishita KIA, sea pa servicio of bishita preso, ta cumpli cu e reglanan di higiena y prevencion di DVG, incluyendo bisti tapaboca.
Despues cu e dos casonan a bira conoci, a duna presonan tambe tapaboca pa uza como extra medida di prevencion. Ningun di e dos casonan no tin relacion cu otro y ademas; e origen di contacto tampoco a sosode den KIA.
Famia di detenidonan y comunidad en general por ta trankil cu e situacion den KIA ta bao di control y tur medida di prevencion ta vigente 24/7. “No por descarta cu casonan positivo por surgi, sinembargo personal di KIA ta hopi bon prepara”, tabata palabranan di e director Gino Winklaar.
