Un di e institutonan cu ta instrumental den implementacion di e Arubig ta e instituto di calidad (Kwaliteitsinstituut). Sin duda cu for di e preguntanan cu e fraccionnan den Parlamento a haci recientemente na Ministro di Salud Dangui Oduber relaciona cu introduccion di e Arubig por a nota cu Parlamento no tabatin obheccion den e contenido di e Landsbesluit, sino mas bien tabatin necesidad di haya splicacion di e Landsverordening BIG y e Kwaliteitsinstituut. For di esaki por conclui cu no lo añadi nada mas na e proyecto di ley y lo manda esaki pa Gobernador.
Leynan pa garantisa cuido di salud
E Ordenanza Nacional profesionnan den cuido di salud, esta e Landsverordening beroepen in de gezondheidszorg of e asina yama ‘AruBIG’ y tambe e Ordenanza Nacional calidad den cuido di salud, esta e Landsverordening kwaliteit in de gezondheidszorg ta leynan cu ta traha como un solo sistema pa asina garantisa e calidad di cuido di tanto profesionalnan como e instancianan den ramo di cuido. E AruBIG ta un ley macro (‘een raamwet’) cual su implementacion mester tuma lugar den fase y a cuminsa caba riba 15 di augustus 2017.
Cu e Decreto Nacional aki e articulo 44 di AruBIG tambe a keda anula. Esaki hustamente tabata e articulo cu mester a percura pa un transicion y alternativanan mientras cu e Kwaliteitsinstituut no a wordo institui ainda. Cu e anulacion di e articulo aki gobierno a keda para bou di un presion enorme pa institui e Kwaliteitsinstituut aki mas pronto posibel. Legalmente e Kwaliteitsinstituut a wordo crea caba segun articulo 14 di e Ordenanza Nacional calidad den cuido di salud (Landsverordening kwaliteit in de gezondheidszorg).
Reconocemento di e registro na 2017
E articulo 7 inciso 2 punto a di e AruBIG a keda elabora den e Landsbesluit AB 2017 no. 54 den cual e registro a wordo reconoci. Segun e Decreto aki ta trata e registro Hulandes BIG y tambe e sistema CanMeds. E ultimo aki sinembargo ta un eror, pasobra e sistema CanMeds no ta un registro. E Landsbesluit a wordo implementa sin cu e infrastructura pa e registro a wordo estableci. Hecho ta cu 40% di e specialistanan e ora no ta autorisa conforme e articulo aki y p’esey semper mester sigui e excepcion pa medio di un permiso (‘een ministeriële beschikking’) pa wordo permiti pa traha, mientras tanto cu e unico alternativa pa e fase transitorio di articulo 44 di e AruBIG a wordo anula. Den poco palabra mester a:
- Elabora riba e investigacion y apunta e organonan di acreditacion y tambe e exigencianan di estudio (‘opleidingseisen’) y pa medio di esaki hustamente stimula e specialismonan mas deseabel for di nos region;
- Duna un estimulo pa por sigui specialisa y e regreso di nos yiunan di tera cu a bay studia den region y a specialisa.
Stimula yiunan di tera pa regresa nan pais
E Ministerio di Turismo, Salud y Deporte a drenta na aña 2018 den dialogo cu e sector di cuido pa asina cuminsa traha ariba organonan di acreditacion cu lo wordo apunta, manteniendo e calidad di cuido como punto di salida. Durante casi un aña diferente reunion a ser teni cu diferente profesional den cuido. For di inicio Minister Dangui Oduber a pone bon cla cu nos lo bay sondia mas posibilidad pa bini cu specialistanan pa amplia nos cuido aki na Aruba y mas aun cu e meta pa stimula nos yiunan di tera pa regresa nan pais cu un specialismo y duna oportunidad pa specialisa den region. Ademas a cuminsa cu e investigacion riba e calidad y exigencianan di estudio di e universidadnan den region.
Organonan di acreditacion
E organonan di acreditacion ta test e calidad di estudio y e curriculum. E organonan di acreditacion cu a wordo selecta ta conforme e tratado MULTRA y ta situa den e paisnan cual ta conoci cu e yiunan di tera a bay studia y goza di nan specialisacion. E Tratado MULTRA ta percura pa e reconocemento internacional di diploma. Manera ta conoci den cuido di salud tin e tendencia pa globalisacion, particularmente pa motibo di e escaces. Mester remarca cu e Landsbesluit ta percura pa specialismonan. Mester por papia di e autorisacion completo di e profesional (bevoegdheid in volle omvang van de zorgprofessional). E preocupacion expresa cu ta p’esey dokternan general por establece nan mes como dokternan di cas ta pues un ekibocacion. Un dokter di cas ta un specialismo y e dokternan general cu a studia na Latino America – e medico ciruhano – mester specialisa como dokter di cas prome cu e por cuminsa traha como tal.
Implementacion di Kwaliteitsinstituut.
Manera indica a cuminsa cu concipia e Ordenanza di apoderacion (machtigingsverordening) y elabora un plan di organisacion pa e Kwaliteitsinstituut cu propio personalidad legal. A base di e conseho di DWJZ a implementa e instituto aki caba riba 15 di juli 2020 den anticipacion di e Ordenanza aki como comisionario encarga pa logra esaki y tambe como seccion independiente di DVG. P’esey por fin por traha riba un ehecucion corecto di articulo 7 di AruBIG. E Kwaliteitsinstituut por conecta cu e standardnan existente y lo por formalisa y garantisa e normanan pa e asina yama ‘herregistratie’. Di e manera aki por evita cu den practica tin ‘scheefgroei’.
Exigencianan di estudio
E Landsbesluit tocante e exigencianan di estudio (de opleidingseisen) cual actualmente tambe ta referi na e universidadnan den cual e contenido di e estudio pa loke ta e competencianan y p’esey e exigencianan di capacidad mester ta comparabel cu e sistema Hulandes/CanMeds. Por lo tanto ta solamente algun universidad a wordo selecta den e paisnan di Latino America.
Resumiendo, e Meta di e Landsbesluit accreditatieorganen ta pa soluciona e problematica di e autorisacion pa por traha como medico of profesional di cuido y duna nos yiu di tera cu ta studia den netamente e paisnan aki e oportunidad y seguridad cu nan por specialisa den region na un universidad cu ta wordo reconoci pa un organo di acreditacion nombra den e Landsbesluit aki.
Algun desaroyo den practica
- Un gran parti di e mediconan no ta cumpli cu e exigencianan poni den ley;
- E regla pa duna un permiso (vergunning) pa un “tekort” (escaces) a bira un regla na lugar di un excepcion;
- No tin posibilidad pa reconoce e diferente specialismonan adecuadamente;
- Historicamente Aruba no por depende di Hulanda so pa haña profesionalnan bin traha den cuido (desde añanan 30 te awor);
Expertonan ta premira cu entre 2030-2040 lo tin un escaces di profesionalnan na Hulanda y p’esey Aruba no por keda depende di Hulanda solamente;
Mundialmente lo ta bay tin escaces door di e ‘dubbele vergrijzing’ segun W.H.O.;
Tur aña DVG ta procesa 60-70 vergunning pa medico cu ta representa un 40% di e cuido y esaki ta solamente pa dokter. Pa tur profesion den cuido ta mustra e mesun tendencia;
E mediconan cu permiso ta traha pa nos pais pero nunca ta wordo reconoci pa nan labor y calidad di profesionalismo. E Landsbesluit ta pone un fin na e practica inhusto y indesea aki pa gobierno, pa e profesionalnan y pa tur pashent y e pueblo henter. E Landsverordening beroepen in de gezondheidszorg (AruBIG) lo reconoce e organonan di acreditacion di e diferente paisnan ya menciona. Reconoce e estudio di otro paisnan ya caba ta un tendencia internacional manera por mira den tratadonan manera e Multra-verdrag.
Kwaliteitsinstituut gezondheidszorg
A base di art. 14 Landsverordening kwaliteit in de gezondheidszorg tin un Kwaliteitsinsituut gezondheidszorg riba papel, pero no tabata operacional. A base di e conseho di Raad van Advies di 22 mei 2020 pa instala e instituto aki prome cu laga e Landsbesluit AruBIG drenta na vigor a haci esaki temporalmente como un afdeling independiente na DVG. Desde 15 di juli 2020 Director di DVG a firma y instala e Afdeling nobo aki como un paso di transicion pa un organo independiente na 2021. Pronto lo presenta un ley na parlamento pa por haci e inversion necesario den personal, medionan y recursonan pa asina e instituto por haci su trabow adecuadamente conforme ley.
Tareanan di Kwaliteitsinstituut
E tareanan di e Kwaliteitsinstituut ta ancra den ley caba y ta encera:
- Formula standardnan di calidad y indicadornan di calidad;
- Evalua estudionan den e ramo di medicina;
- Haci assessments localmente di esnan cu a studia den exterior;
- Conseha gobierno riba AruBIG, calidad y tur otro topico cu ta regarda cuido di salud;
- Stimula e desaroyo di calidad den e seno di cuido;
- Coordina cambionan necesario pa mehora e calidad di cuido.
Institucion di Kwaliteitsraad
Un tarea importante den esaki ta pa instala un “Kwaliteitsraad” (conseho di calidad).
Recientemente un invitacion a bay pa e asociacionnan di e diferente profesionnan den ramo di cuido pa nan apunta un persona pa representa nan den e Kwaliteitsraad. Conforme art. 15 Landsverordening kwaliteit in de gezondheidszorg e raad ta consisti di maximo 9 miembro.
Mientras tanto e Kwaliteitsinstituut ta trahando caba riba e condicionnan minimo pa logra cu e contribucion di e gruponan di profesionalnan ta wordo uza optimalmente pa medio di e Kwaliteitsraad .
