Un hoben di apenas 19 aña di edad, di inicial Z.W., interna den e unidad di cuido intensivo (ICU) den hospital, ta luchando pa su bida. Di awe tardi cu el a yega hospital den ambulance el a bay den coma, pa cual specialistanan ta busca tur forma pa yud’e, aunke su situacion ta delicado y preocupante. Parce cu e prome 48 oranan despues di un impacto asina ta crucial, pa pashentnan asina.
E accidente a sosode pa 4:30pm na e crusada di Sabana Grandi y Papilon na Santa Cruz. Dos auto a dal semi frontal den otro. Tabatin varios herido, entre otro e mucha homber aki. Na e sitio testigonan a conta cu un di e pasaheronan sinta patras a bin te dilanti y dal su cabes den windshield. No ta conoci si ta esun ey ta den coma awo of ta e chauffeur of pasahero sinta dilanti.
Ta desea e hoben pronto recuperacion y cu nos bon Dios por ilumina e Dokternan den nan trabou pa salba e pashent aki.
