Aruba Lions a ser reconoci pa Lions Clubs International riba 29 di September 1947 y dia 31 di januari 1948 a ser presenta su carta oficial di afiliacion na Aruba Palm Beach Club den presencia di hopi delegadonan y bishitantenan distingui di Venezuela y Corsou.
E fundador principal di e club tabata Lion Jose Walfenzao, kende hunto cu binti ocho otro Leonnan cu determinacion a uni forsa pa logra cristalisa nan ambicion pa Aruba tin un club, mediante cual e miembronan por expresa nan sintimentonan humano na nan semehantenan. Awe, 72 aña mas laat, den preparacion pa conmemora e ocasion hubiloso aki, sin duda e Leonnan actual ta recorda e fundadornan aki cu orguyo y cu sentimento di gratitud pa loke nan a nifica pa Lions Club di Aruba y pa nos comunidad en general.
Desde september I947 Aruba Lions Club tabata envolvi den numeroso proyecto na bienestar di nos comunidad. Pa finnan administrativo y organisatorio proyectonan basá riba necesidadnan di comunidad e proyectonan aki ta ser dividi internamente den diferente categoria. Awendia e Leonnan di Aruba ta hopi activo den Servicionan Social y di Salud, Rolstoel y Cama Especial pa Enfermonan na cas, Monumento y Relacionnan Patriotico, Asistencia Publico y Hubenil y nan Programa Leo (organisacion hubenil).
Rolstoel y cama especial
Un di e proyectonan cu sigur a bin ta acapara atencion di e comunidad ta e proyecto di rolstoel y cama especial. E proyecto aki ta data desde añanan 60 y keto bay ta yudando centenares di famia nan aki na Aruba especialmente na e personana cu ta sufri di un of otro malesa pa cual un cama especial of rolstoel ta un necesidad. Lion Bibi Arends ta lidera e proyecto aki cu hopi amor y dedicacion.
Smile Mobile
Un otro programma cu a wordo inaugura na aña 2012 y cu a desaroya y bira hopi popular den nos comunidad ta Smile Mobile. Lion Igor Croes y Lion Magaly Franken ta bishita nos casnan di anciano regularmente pa brinda servicio y yudansa na nos grandinan dor di duna cuido dor di limpia y hasi cierto ahustacionnan na e dentaturanan di nos grandinan. Smile Mobile ta hasi e labor nan aki riba un base voluntario. Sigur un bunita projecto dedica na nos grandinan.
Patriotismo
Aruba Lions na diferente moda ta expresa su amor pa nos dushi Aruba. Esaki ta cuminsa cu despliegue na un sitio respetuoso den sala di reunion, na unda ke sea nan reuni, di e banderanan nacional di paisnan di e Distrito Leonistico na cual Aruba Lions ta pertenece: Aruba, semper central, flankea pa Merca, Corsou y Boneiro. Prome cu inicio di reunion ta rindi honor na bandera di Aruba cu canto di nos Himno Nacional, sigui pa invocacion y gratitud na Ser Supremo.
Fuera di su honor constante na nos simbolonan patrio, Aruba Lions a sa di crea y ta preserva monumentonan nacional, manera e Monumento pa Victimanan Arubano di 2a Guerra Mundial, y e Rotonde cu nos Simbolo Nacional na Paradera.
Servicio Comunitario
Aruba Lions a hunga un rol importante den servicionan den ramo di salubridad, manera deteccion y prevension di malesa, e campaña anual pa haya donantenan di sanger pa nos Banco di Sanger, yudansa na FADA pa educacion y prevencion di abuso di droga y diferente donacion nan.
Aruba Lions tabata tambe semper masha activo den ramo di conservacion di bista y fuera di donacionnan na FAVI a duna den pasado asistencia na hopi ciudadano pa por busca ayudo specialisa pa nan problema di bista den exterior.
Asistencia social di Aruba Lions tabata encerá esnan cu problema fisico y mental, y tambe nos grandinan, cu participacion activo pa hopi aña largo den directiva di fundacion SABA.
Tambe e tabatin participacion activo den accionnan pa esnan cu problema di oido y problema di papia. Cu asistencia na FEPO den su añanan inicial, permitiendo nan pa hopi aña largo uso di e club pa nan oficina y despues un espacio den cura di club pa nan propio oficina mobil promer cu nan a logra nan mes edificio bisiña di Lions.Otro fundacion cu a ricibi semper sosten total tabata esun di Diabetes.
Den ramo di servicionan general Aruba Lions a y ta entrega cada december atrobe, y ya pa varios decada, macutonan di comestibel na esnan menos afortuna memey di nos.
Aruba Lions semper a duna debido atencion na organisacionnan hubenil, manera entre otro scouting y organisacionnan deportivo hubenil, manera Aruba Little League y varios otro ramo di deporte hubenil. Cu masha frecuencia e club a asisti Imelda Hof y ainda te memorabel e celebracionnan di Sinterklaas cu e tabata organisa y tene pa e muchanan eynan.
Adicional na tur su proyectonan Aruba Lions a y ta duna contribucionnan na organizacionnan caritativo y educacional, especialmente na nos scolnan, sea cu yudansa di material escolar na e alumno y yudansa general mediante water coolers.
Recaudacion di Fondo
E proyecto mas grandi di Aruba Lions Club pa recauda fondo ta su Rifa Anual di Cas ya pa casi 6 decada. Aña pasa, Aruba Lions a rifa su di 59 cas, e biaha aki uno cu un diseño masha atractivo y moderno situa na Jan Flemming na Santa Cruz.
Orguyoso di su logronan
72 aña di servicio humanitario sin duda ta algo pa bati riba pecho y por nota esey tambe na e miembronan di club, cu ta orguyoso di e hendenan cu a lanta e club aki, orguyoso di tur loke nan a logra haci den tur e añan ey, y tambe sumamente orguyoso di e comunidad Arubano, cu a contribui generoso na nan proyectonan di recaudo di fondo y asina a yuda e Leonnan aki den nan ayudo nan nos propio comunidad.
Tempo berdad ta pasa bulando hibando cune e recuerdonan di e temponan pasá. 72 aña pasá cos tabata diferente na Aruba. Hopi cos a cambia na nos dushi Aruba durante e 72 aña di existencia di Aruba Lions Club. Entre nan varios hopi importante den realizacion di cual e club tabata instrumental cu su accion y servicio na bienestar comunitario.
Tambe riba tereno di Leonismo Internacional Aruba Lions Club a sa di sobresali y cu orguyo a skirbi historia cu tres Gobernador di Distrito for di su seno: Ln. Oscar Marugg (1964-1965), Ln. Elias Fingal (1985-1986) y Frank H. Croes (1999-2000), cual ultimo a logra tambe su eleccion como Presidente di Conseho di Gobernadornan pa e periodo 2000-2001.
Districto nobo
Te cu 30 juni 2018 Aruba Lions tabata resorta na districto E-1 conhuntamente cu Venezuela Bonaire y Curacao. Desde 1 juli 2018 Aruba Lions Club a haya tranferencia pa districto 35 N conhuntamente cu e isla rumannan Bonaire y Curacao. E districto 35 N a keda oficialisa como: Florida, Bahamas , Aruba , Bonaire y Curacao.
Aruba Lions Club band
Manera menciona anteriormente , Aruba Lions ta conoci pa un gran cantidad di proyecto. Sigur un di nan cu a acapara atencion aki na Aruba ta e Aruba Lions Club band. E banda aki ta consisti di solamente di miembronan di Aruba Lions. E banda musical aki a sa di bishita den luna di maart diferente cas di anciano rond di nos isla pa asina deleita nos grandinan cu nan musica. Tabata un satisfaction enorme di mira nos grandinan goza e dia aki. Pronto e banda aki lo ta sacando nan prome disco compacto riba mercado
Bista:
Un di e aspectonan cu Lions Internacional ta pone hopi atencion na dje ta e parti di bisti. Aruba Lions tambe ta mira e importancia pa cu esaki. Pa es motibo aki a dicidi di adquiri un Vision Spot Machine”. Cu adquisicion di e equipo ultra moderna aki centenares di persona especialmente nos muchanan por conotrola nan bista . Sigur esaki lo bay benficia nos comunidad especialmente nos muchanan.
Futuro miembro?
Si acaso bo ta reconoce bo mes y ta sintibo atrai y kier mas informacion over di Aruba Lions y su proyectonan, bo persona por contact un di e miembronan di Aruba Lions Club cu bo conoce of por tuma contacto cu Ivan Croes via e mail na p[email protected]
