Un ingeniero local cu experencia den generacion di energia y maneho di deperdicio a acerca nos redactor pa expresa su pensamento riba nivel tecnico encuanto maneho di sushi na Aruba. “Aruba tin e solucion pa maneho di desperdicio caba. Despues di separa materialnan cu por wordo recycla for di e sushi, e sushi por wordo prepara pa wordo gasifica manera cu tabata e pensamento y acuerdo entre WEB y EcoGas.
Aunke cu e progreso di e proyecto aki no tabata wordo comparti, nos por deduci cu e proyecto tabata fructifero den produccion di gas pero aparentemente e gas no a yega na e calidad cu WEB tabata kier pa su motornan pa genera coriente. Pero e gas aki por wordo kima sin ningun problema den e boilernan di WEB. Hopi biaha e valor calorifico di e gas produci for di sushi por subi y baha afectando asina e produccion di vapor of di coriente, depende si ta kime den un boiler of den un generator. Pero nos localnan a kima gas y azeta hunto den e boiler- y fornonan den refineria pa decenas di anja sin problema. E azeta ta pick-up e drop den caloric value di e gas ora cu esaki baha masha rapido mes sin causa interupcion di produccion. Na WEB tambe esaki por wordo haci sin mucho problema pero e interes pa hacie mester tey of, e tecniconan na WEB mester sali dilanti y expresa cu esey por sin ningun problema ya cu casi tur ingeniero cu ta den WEB a traha den e refineria tambe. Si en caso e nivel di H2S ta mas halto cu e specificacion cu WEB ta pidi pa kima den e generatornan, esaki no ta ningun problema pa kime den boiler.
Es mas, e gas aki ta saca menos emision en comparacion cu e azeta cu ta wordo kima actual, dus menos molester pa waf na Barcadera. Actualmente tin un discusion ta andando riba e tema aki unda Gobierno y EcoGas no ta yegando na otro. Esaki ta hopi lamentable pasobra EcoGas tin e solucion caba y un Waste to Energy manera cu Gobierno ta forsando riba dje no te e solucion. Es mas, e ta bay costa pais Aruba hopi placa y si en berdad nos kier bira un pais cu ta recycla sushi responsablemente, hasta sushi lo mester importa despues pa e Waste to Energy sigui draai pasobra un planta asina mester di sushi pa e keda draai. Imagina cu ATA ta traha duru pa promove Aruba su buniteza, su beachnan y su medio ambiente y Aruba ta importa sushi di e otro banda. E dos manehonan aki ta encontra di otro y sigur no ta e rumbo deseabel pa Aruba.
Locual cu ta bon pa haci ta pa tene un debate tecnico riba e tema aki. Aruba por conta cu diferente ingenieronan cu experencia riba e tema aki. Pa pueblo lo ta interesante pa scucha for di e tecniconan kico nan ta pensa y cual di e solucionnan ta mihor pa Aruba. Na mi opinion esaki ta un tema cu ta un poco “te hoog gegrepen” pa Gobierno y no mester laga politica defini e direccion sino laga tecniconan, cu conocemento di e tema, expresa kico lo ta mihor pa nos pais pa asina nos no bay gasta miyones di florin pa un proyecto inecesario ”. Te aki e comunicado ricibi for di e ingeniero y experto cu ta desea di keda anonimo.
