Djaweps 21 di sèptèmber 2017, alrededor di 23.34 or, Sentral di Polis a risibí notifikashon ku un persona a keda sekuestrá i hibá na Shut. Mesora a dirigí un unidat polisial na e sitio.
Yegando na e sitio nan a topa un outo ku tabata koriendo bini den nan direkshon.
A para e vehíkulo i a topa ku un dama i un hòmber den e vehíkulo. Mientras tantu un otro unidat polisial a lokalisá un hòmber ku tabata skondé den mondi. E hòmber víktima di 20 aña di edat nasé na Kòrsou, a deklará ku un hòmber i un hende muhé a buské den un vehikulo na su kas, tresé Shut i maltraté. E víktima a logra hui bai for di e sospechosonan i bai skonde den mondi i yama polis. Alrededor di 00.05 or di mardugá polis a detené e okupantenan di e vehikulo ariba menshoná, e hòmber R.A.S. nasé na Kòrsou di 29 aña di edat i e dama M.J. nasé na Kòrsou di 25 aña di edat. Detenshon ta relashoná ku e kaso di sekuestro i maltrato ariba menshoná.
A presentá e sospechosonan dilanti di un Fiskal Ouksiliar.
