E doño di Kamini’s Kitchen na San Nicolas, esta Kamini Kurvink a bisa awe cu ta dos biaha sigui tras di otro cu ta cende candela den vecindario directo di su restaurant. E ta corda esunnan responsabel cu eybanda nan tin tanki di gas comercial cu ta forma un peliger grandi pa e restaurant mes y pa e casnan den vecindario.
Nan tin riba camara ken e haci’e!
E video di siguridad ta indica bon cla con un auto ta para dilanti e restaurant, ta cende “hazard lights”, ta baha y diripiente ta mira e candela ta cende y crece den forma rapido. Un acto di baldadi pero cu por bira un asunto serio si e candela sigui expande lihe y yega na e restaurant.
Entretato, mirando e situacion di crisis di e pandema Coronavirus, e comerciante a opta pa cera su restaurant y a manda su empeadonan cas pa nan cuida curpa. E ta spera cu pronto nos por sali di e situacion aki pa por reanuda trabou. Pero entretanto no por ta asina cu dos biaha caba e mester a core bay su restaurant pasobra tin candela den vecindario directo.
E ta pidi pa mas control y vigilancia eybanda pasobra un di e dianan aki e candelanan intencional di mondi lo por causa un desaster pa henter e area.
