Angela Altagracia Lopez-Rodriguez ta biba den Indianenweg y su compleho di apartamento no tin cura. E tabata paden y a sali dilanti su apartament pa tira awa afo. Un auto di recherche a para y e homber a identifica su mes como Polis y a boei e señora, bisand’e cu tin Toque de Queda y cu e no por ta riba caya. E ta sinti cu e Polis tabata wardand’e sali pafo pa detene y cu e no sa mes di Toque de Queda.
E señora a splica cu e no ta mucha, sino ta un hende grandi. E semper ta tene su mes na regla pero no por compronde con un recherche ta bin 1 minuut despues di 9:00pm para dilanti su compleho di apartament pa deten’e siendo e ta letterlijk 2 of 3 meter dilanti su porta di cas, teniendo cuenta cu e tereno eydilanti no tin un cura pa cer’e. E ta sinti cu esaki ta di mas y ta boei e manera un criminal y ta pone su cara na berguensa.
E tabata na cas henter dia y a bay pafo cu su hemchi di awa pa tira e awa riba e santo pa e por a bay paden pa baña y subi cama. E no ta hende cu ta sali riba caya mes y no ta busca problema cu autoridadnan.
Su casa y yiu paden tabata yora pa e forma con a trat’e, pero el a bisa nan pa keda paden pa evita cu ta detene nan tambe. E casa a perde trabou y nan no sa di unda lo saca e mil florin ey awo pa paga den dos siman. E ta spera di por haya ayudo pasobra e no ta sinti cu el a haci nada contra ley of malo.
E ta conseha tur hende pa keda paden y pa nan no pasa den e experiencia cu el a pasa aden innecesariamente, sin cu e mes ta na altura di e maneho nobo aki di TDQ.
