Recientemente partido AVP a bin den publicidad, caminda cu el a indica cu e lo redobla pensioen di biehes, asina cu e drenta gobierno bek. Sinembargo, partido MEP no ta di acuerdo.
Segun Juni Croes, di partido AVP, manera den pasado ora partido MEP a bay contra e redoblacion di pensioen di nos grandinan den añanan 90, partido MEP un biaha mas ta demostra su menosprecio pa nos pensionadonan cu tanto a sacrifica nan bida pa progreso di nos pais bisando cu no por duna nan e aumento di 50 %.
Un parlamentario di MEP confirma pa esaki ora cu el a declara cu e pensionadonan lo mester warda te cu otro aña pa haya un aumento di mas o menos 40 pa 50 florin,un aumento cu ta mara pa ley. Ta parce cu pa e Gobierno di partido MEP, 40 of 50 florin mes lo ta suficiente pa nos grandinan.
Un gobierno cu a haya 500 miyon extra na entrada door di tur e medidanan imponi ariba lomba di pueblo, manera un aumento di BBO,y cu medida nobo manera un BBO na frontera. Tambe nan ta keda sin absorba e accijns ariba gasolin,y cada biaha gasolin ta keda subi,coriente y awa a casi redobla door di keda ranca placa di Elmar y WEB,anto cu tur e 500 miyon extra na entrada aki no kier duna un aumento mereci di 50 % na nos pensionadonan,y no cu e aumento aki lo haci cu nos pensionadonan lo bay biba den luho tampoco.
Pero sikiera e por yega un poco cerca di e minimo cu e pensionado mester pa por biba un poco mas comodo, ta kico a haci cu e 500 miyon extra aki, cu no por duna un aumento awo na nos pensionadonan? Pueblo keda pendiente pa mira na unda e gastamento di placa aki a bay. Gran parti di e placa casi sigur lo a bay na biahamento rond di mundo di e gobierno aki su ministernan.
Mientras ta keda gasta placa na biahamento. E mesun parlamentario di MEP aki cu a declara cu pensionadonan mester keda warda te otro aña pa haya 40 of 50 florin ,e parlamentario aki si hunto cu 2 otro colega di MEP ta keda den camber hunto den un hotel na Hulanda,pa spaar placa cu ta Sali di saco di pueblo. Ta spaar mas di 300 dollar pa dia cu ta bay den nan saco,pero segun partido MEP, e pensionado si mester warda te otro aña pa e por haya su 40 florin. Esaki ta un bofta y un insulto den cara di nos pensionadonan.
Pa AVP den ningun asunto, color politico mester hunga un rol, sigur no ora ta trata nos pensionadonan. Pasobra tur pensionado, sea ta MEP of AVP of otro color politico, merece un aumento cu lo por yuda nan biba un bida mas trankilo y pa asina nan por disfruta e fase bunita di e bida aki den harmonia cu nan famia. Despues di a pasa casi henter un bida ta traha pa e pais aki.
Pero un palabra di sosten na nos pensionadonan, tene fe. Ta compromiso sagrado di mi persona y henter Partido AVP pa duna e aumento aki manera AVP ta den gobierno, cu no ta simplemente un promesa of un deber,pero un mester!
Y si acaso tin esunnan cu ta duda un poco ainda,cu e aumento aki ta uno realistico y sostenibel,djis tuma ehempel di e redoblacion di pensioen cu a tuma luga un 30 aña pasa cu t’ey te dia di awe y tambe e reparatie toeslag cu AVP introduci cu te dia di awe t’ey ainda .AVP ta conoci pa logronan duradero y sostenibel. Djis core rond di Aruba y wak pa bo mes tur e proyectonan realisa pa partido AVP.
Partido AVP su unico compromiso ta cu e pueblo aki,unda henter Aruba lo mira progreso un biaha mas. Ban bolter cos. E boltermento bek pa bo felicidad ta den bo mesun man ora yega e momento pa bo haci uzo di bo derecho Sagrado di vota den e proximo eleccion ariba Partido AVP.
