Banconan ta haciendo transicion di Maestro pa Master Card y probablemente esaki ta bay bin cu consecuencia di redobla – si no ta p’e fin di aña aki lo ta e otro aña – gastonan bancario cu aumento di 50% of 100%.
E desaroyo aki ta perhudica comercio cual hopi biaha ta keda traspasa p’e consumidor. Por a mira esaki den locual tabata cobransa di stacion di gasolin pa meternan di Elmar prepago, y asina aki tin un discusion infinito pa loke ta gasto bancario. Si nan bolbe subi, nos a puntra minister di Asuntonan Economico con ta mira e desaroyo aki unda cu naturalmente teniendo cuenta riba e consumidor.
“E ta algo preocupante, y mi lo desea pa en bes di uza un plataforma internacional, pa uza un plataforma local pa transaccion local di consumidor pa negoshi y di negoshi pa negoshi.”
Pues e mandatario ta bisa ora cu haci transaccion internacional, ta depende di un plataforma di clearing internacional. E mandatario ta bisa cu naturalmente e no ta haya e desaroyonan aki positivo y ta desea pa ta diferente pero ki tipo di prerogativo lo tin, cual na momentonan aki no tin ningun prerogativo legal pa interveni. “No ta un decision cu ta den mi man cu mi por prohibi nan di haci tal cos, y mi ta kere esaki tin di haber cu competencia den mercado liber.”
Riba prome di januari di 2024 gobierno a inaugura Aruba Fair Trade Authority cu ta un autoridad cu tin e tipo di poder aki pa haci investigacion pa wak si esaki ta permiti, pero esey no ta algo cu Minister di Economia por haci. “Tampoco ta den mi prerogativo pa duna instruccion. Ta cosnan cu asuntonan di mercado liber bo tin cu trata cu cierto distancia. Den un pais cu tin comercio liber, e gobierno tin su distancia y bo no por sin mas interveni. Den e caso aki mi no tin instrumentonan legal pa por interveni tampoco.” E minister ta bisa cu e ta keda algo cu ta pafo di control di gobierno.
