Julio Croes tambe ta un touroperator y e ta preocupa. Tur siman e ta na waf. E ta splica cu ta spera cu por yega na un entendimento cu polis, cu APA, cu DTP, pa asina nan por haci nan trabao miho. Asina aki nan ta bin impone riba nan cu nan no por traha. Tin di nan tin 15 of 20 aña eyfo. Nan ta e seftanan di turista eyfo, hayando e resto di turistanan cu sali. Si nan bin para nan bus parti pabao, no ta bende e mercado. Ta mescos cu bay un tienda. Bo kier cumpra un paña bo tin cu wak’e, ful’e. E turistanan tambe mester ta cerca di e auto, wak e condicion di e auto, pa por yena e bus y pa nan por haya e tour. Otro manera no por. Tin cu cana cu e turista, cual ta basta leu. Pa ora bin bek, bo no ta make it pa yen’e. E ta bira dificil. E luga ta bunita traha tur cos. Djis pa duna nan e oportunidad pa nan por traha eyfo, manera cu nan ta actualmente.
Tur e ultimo añanan, tabata tin yen di problema. Ultimo aña el a bay hopi miho. Croes ta spera cu polis sigui bin pa pone ordo si. Nan ta esun cu ta bende e turista. Nan ta bende Aruba, pasobra e turistanan cu ta bin Aruba, via crucero, pa aña 25% ta bin bek Aruba. Nan ta bin keda un siman. Nan ta haci e tour. Ora cu nan mira e limpiesa di tour, y cierto caminda na Aruba ta limpi, nan ta bisa cu esaki ta “the best in the Caribbean”. E touroperatornan tin hopi experiencia cu e turistanan cu ta bin prome biaha cu crucero. Tin ta bin bek y ta trece nan famia. Y ora nan bin bek, nan ta recomenda otro famia, otro amistadnan cu tambe ta bin bek. Nan tin cu atende nan. E ora e touroperatornan ta probecha di tur e turistanan cu ta bin Aruba. Sea cu ta taxi of sea tour, nan ta beneficia di dje. Nan ta e cara cu ta bende Aruba pa e turistanan cu ta yega aki riba.
Yega na otro
Segun Croes, tin cu yega semper na un solucion sano. Solucion ta papia tin cu papia, pa bisa si esaki por of no. Basta cu nan haya nan luganan di para, cu por yena nan, unda cu e turista ta cerca di e auto. Si e ta leu, no por yene.
Unda e problema ta sinta
Segun Croes, kier kita e tourbusnan for di eynan. Tin un bochi cu ta poni pa bus, pero ta bisa cu mag di baha y subi. Un otro caminda ta pa taxi, cual no ta problema. E busnan ta para patras, un ta bay, un otro ta bin. No ta mira pakico ta stroba eynan. E solucion ta cu tin cu cera e luga, lage solamente pa tour y taxi. Bo ta haya hopi local tambe ta pasa shortcut eyden. E ta bira un chaos. Pesey trafico ta tranca. Por bay tour, bin cu e turista bahanan pabao y cana bin ariba. Ora cu e tour caba. E via ta keda liber. Ora cu e caminda keda liber, bo no ta haya stancamento. Stancamento ta pega hopi ora hende crusa caya. Tin biaha nan mes ta yuda e turistanan crusa caya, vooral esnan cu bin den rolstoel.
Discusion
Door di tur e discusionnan aki, Croes no a haya trabao. El a bin ayera tambe, pero door di henter e discusion cuenta di touw bus, e no a keda.
Croes no a papia cu polis. E coleganan a bisa cu a papia cu dos agente mainta y a bisa cu por dal bay tanten. Pero no por bisa kico a papia cu polis. A mira esnan di DTP tambe eynan. E cosnan aki ta dolor di cabes. Bo a gana cen awe, pero despues hiba e auto mecanico. Ta gasto e cosnan aki ta. Tin hende ta gana placa, pero na no sa cuanto gasto nan tin.
Tampoco nan no tin invoerrechtvrij. E bus cu Croes tin ta di 94. E tin cu mantene constantemente. Awor aki e compressor a daña cun’e y e ta caro. Pero ta lucha. No ta give up.
