Pa pareha di Erwin Warnies, e co piloto di Cuerpo Militar Hulandes di 33 aña, cu a muri na juli den accidente di Helicopter pabou di Aruba, mester a regresa cas despues di e mision. Pero awo e no t’ey mas y p’esey su pareha ta conta storia di Erwin y pa nan yiu sa ken e ta.
Erwin Warnies a bisa cu e lo bolbe cas despues di e mision, pero esey no a pasa. Jessica a kere den su palabra di ta bin bek cas.
Jessica Havik a bisa cu ocho aña pasa e a conoce su amor riba un barco. Ambos tabata militar y tabata riba un mision di operacion contra droga den area di Caribe. Jessica tabata encarga pa cuminda y co’i bebe, mientras Erwin tabata un wachtsofficier. Nan tabatin mesun rango y hopi biaha tabata cu otro, tabata e unico oficial femenino y p’esey Erwin a ofrece di sinta mira peliculanan di hende muhe y serienan cu ne.
Nan a cuminsa sali hunto pero a dicidi despues di algun luna bay biba hunto na Den Helder, cerca di e base cu nan ta traha.
Ambos tabata gusta aventura, p’esey Jessica mes ta traha den Defensa. Ora Erwin tabata na cas, e tabata yena esaki cu su hari, tabata conta storianan y despues tabata papia cu nan yiu. Dos aña pasa cu Fleur a nace, Erwin tabata sumamente contento y ora cu e mester a bay, e tabata sa ta laga algo atras. El a bira un tata cu cada bes e tabata mustra su amigonan potret di Fleur, pero tur esey Jessica a haya sa despues di e morto di Erwin.
E aña aki cos a cambia pa nan, pasobra un biaha mas Erwin mester a bay riba un mision anti droga. E helicopter NH90 cu Erwin y Christien Martens tabata den, a crash cerca di Aruba. Segun Jessica, ta algo cu nan a haci hopi biaha. Nan mester a regresa e barco despues di patruya. Nan tabata train algun biaha, pero e di ultimo biaha algo a bay robes. Inspectie Veiligheid Defensie (IVD) ta investigando kico a pasa. Dos persona a scapa, pero Christien Martens y Erwin a fayece. A reanima nan, pero nada.
Pa 12:30AM un militar bisti na civil a presenta, pero Jessica no a kere. El a pensa cu e cos ey tabata un joke pasobra e sa e procedura. Na momento cu el a mira Admiral di Marina, e tabata sa cu Erwin a fayece. Jessica mester a bisa Fleur cu su tata a muri. Durante entiero Fleur a pone su dedenan na su tata, pa purba kishikie manera e tabata haci ora di drumi of sinta riba sofa. El a bisa su mama cu su tata no ta reacciona. E ora ey e yiu a realisa cu su tata di berdad a muri y lo no regresa nunca mas. Desde e momento ey, Fleur no ta laga Jessica su so, pero awo ta bay miho desde cu nan a bay campa. Segun Jessica, awo Fleur ta mas miho, aunke tin biaha ta coy potret di e tata pa papia cu ne.
