E hecho cu awa a subi tera na Baby Beach den e siman cu a pasa a hala atencion di hopi hende y tambe di Urbano Geerman, electricista di profesion pero amante di lama. E hecho aki “ta algo cu ta sosode tur aña asina cu luna di october yega of den temporada di horcan”.
Geerman a bisa cu tin asina hopi cambio climatico y Aruba tambe ta mir’e poco poco, manera e forma con e tempo ta aki na Aruba, compara cu hopi aña atras. P’esey ta importante pa ora subi lama ta masha importante pa tuma tur medida di precaucion, sin importa cuanto experiencia bo por tin. “Den un rato di ora tempo por cambia y bo ta perde tur cos,” Geerman a comenta.
E cambionan di clima ta bin of ta mira nan poco-poco. Pa ora e hendenan por realisa, ya caba nos ta den dje. El a ripara, por ehempel, cu tur aña e lama ta subi tera pero ta sinti tambe cu e ta bira mas hopi. Pero ta dificil pa bisa con pa prepara. Solamente por tuma precaucion, manera tene cuenta cu tur aspecto di siguridad. “Ta den man di Dios nos ta keda.”
Aki na Aruba toch tin union bou di e piscadonan y esaki a trece cu ora tin lama bruto, un ta avisa otro y asina a logra scapa hopi boto ora di mal tempo.
