recientemente tawata dia internacional di equidad di hende muher y den cuadro di esaki a organisa un evento tipo town hall meeting na Cas di Cultura caminda cu a duna dos charla facilita pa e experto internacional Sra Karin Bosman y Sra Sandra Brown y despues a habri microphone pa contesta pregunta y delibera ariba e topico di intimidacion sexual na pia di trabou.
E interes pa e topico tawata grandi y necesario mirando cu e statisticanan pa Aruba. Statisticanan ta mustra cu 1 di cada 3 hende muher ta experienciando un forma of otro di intimidacion sexual na Aruba, sin conta e studiantenan y stagiarenan. E ta un problematica taboo pero cu no por continua ta uno cu no ta papia di dj’e, e ta afectando nos forsa laboral y ta afectando nos studiantenan y esnan cu ta core stage.
E ta un topico cu nacionan uni tin halto ariba agenda y tin diferente campaña andando ful aña despues di #metoo y e campaña pa invita hende hombernan pa uni na e lucha pa promove mas respet den comunidad y profesionalismo na trabou cu yama #Heforshe. Na Aruba tambe mester sigui pone mas atencion ariba e topico aki y e desigualdad di poder entre hende muher y hende homber. Preguntanan cu a ser treci durante e anochi di Town Hall Meeting tawata, ki ley ta existi na Aruba tocante intimidacion sexual na trabou, cual den codigo civil tin un ley desde 2015. Falta tambe pa traha riba riba e Arbo wet, cu tambe ta forma parti di e lugar sigur di trabou. Hopi companianan priva si tin protocol pa cu e topico aki y mester continua duna mas informacion na nan trahadornan. E topico mester keda uno cu ta continua pone atencion p’e pa asina Aruba tambe por logra metanan cu riba nivel internacional ta trahando duro riba dj’e na beneficio di nos sernan femenino y e comunidad den su totalidad.
