Parlamentario Endy Croes a sigui desaroyo internacional di turismo di cerca y por a tuma nota di un “shift” hopi preocupante na Republica Dominicana primordialmente na Punta Cana. Turismo a cay den comparacion cu arrivals di 402.709 na juli 2018 pa 311.038 na juli 2019, esta 91.671 menos segun un rapport di Banco Central di Republica Dominicana di 29 di augustus ultimo. E caida significante aki a conduci cu entre otro e resort Majestic Elegance Punta Cana a cera su portanan entrante 15 di augustus ultimo.
Motibo pa e caida den turismo
Mester remarca cu Cuba tambe a conoce un caida di 23.6% den turismo. Punta Cana ta conoci pa un destinacion turistico y tin un inventario di 40 mil camber di hotel y ta habriendo e aña aki un adicional 4000 camber. Den luna di juni turismo a cay cu 7% cual tabata indicacion hopi preocupante pero esaki a cay cu 22.8% den luna di juli cual a bira alarmante.
Segun fuente di informacion e rason primordial cu a causa esaki ta noticianan negativo den media specialmente media Norte Americano kendenan desde luna di mei tabata impulsa cu no ta “safe” pa keda den hotel na Republica Dominicana refiriendo na un lista di turistanan cu a fayece recientemente den hotelnan na Punta Cana na un manera misterioso. Booking di USA pa Republica Dominicana a cay cu 74% cual ta e gran causa di e resultado aki den su totalidad.
Turismo ta nos unico pilar economico
Parlamentario Endy Croes ta haci un yamada na henter nos comunidad. Turismo actualmente ta nos unico pilar y ta e galiña cu tin e webo di “oro” pa cu economia di Aruba. Parlamentario Croes ta splica cu el a relata e storia aki pa conscientisa tur pero tur hende cu ta biba aki pa realisa con vulnerabel un noticia negativo por refleha den un tempo record y cuanto daño e por ocasiona. Aruba ta ricibi mas di 70% di su turismo for di USA. Parlamentario Croes ta suplica tur sector cu ta atende cu turista desde hotel, taxi, restaurant, bus, tour operators y tur otro cu ta brinda servicio, empleadonan cu ta traha directamente cu turista y henter comunidad di Aruba pa aprecia locual cu nos tin y ban haci e compromiso mas profundo ainda pa brinda e hospitalidad den totalidad pa aporta pa nos turismo por sigui crece. No solamente nos mester keda percura pa turismo sigui crece pero siña di lesnan menos bon di nos competencia pa inculca den henter nos pueblo pa aprecia y cuida locual nos tin.
Ban sigui cuida nos turismo
Laga nos siña di locual por ehempel ta pasando na Republica Dominicana y Cuba cu ta nos competencianan hopi cerca. Ban conserva cu tur nos forsa cual ta nos turismo y cu nos curason na e lugar corecto percura pa brinda e mihor hospitalidad posibel na nos turistanan y bishitantenan. Croes ta termina bisando como politico hopi biaha kisas nos ta bringa nos opositornan riba diferente tereno pero den causanan grandi pa bienestar general di bo pais mester tin espacio pa nos tur mira hunto den e mesun direccion pa e causa colectivo di bo pais. Mi plegaria na henter pueblo di Aruba ban hunto ban cuida nos pilar esta nos turismo. Aruba dushi tera!
