Dialuna atardi pa mas of menos 5:20PM den Van Leeuwenhoekstraat, net pariba di La Granja di Playa, a sosode un accidente. E accidente aki a sosode na momento cu e chauffeur di Jeep no a duna preferencia na un Chevrolet.
E Chevrolet color shinishi cu plachi number A-27558 tabata bin di La Fama cu direccion La Granja na momento cu un Jeep color shinishi cu plachi number A-55687 cu tabata bin di Hospitalstraat a crusa dilanti dje. E accidente tabata uno fuerte, pasobra e Chevrolet a draai y termina cu cara pariba.
Polis a presenta na e sitio pa tuma dato di ambos partido di loke a pasa, pero tambe pa guia e trafico na e momento ey. Tambe a pidi asistencia di ambulance pa dos persona cu tabata keha di dolor. Na yegada di ambulance, e paramediconan a controla nan.
E Jeep no a haya hopi daño, pero e Chevrolet a sufri hopi daño na dje. Mientras cu e chauffeurnan tabata duna nan declaracion di e accidente, takelwagen a presenta na e sitio pa bay cu e Chevrolet. Esaki tabata pa motibo cu e taira patras banda drechi a sali y esun patras banda robes a dobla.
